La Helvetia Nostra cun ses advocat Rudolf Schaller fa recurs encunter gronds projects che cumpiglian uschenumnadas abitaziuns administradas. Uschia er cunter il project a Dieni il december passà. Il privel ch'i dettia tuttenina segundas abitaziuns or da quellas è per Rudolf Schaller pussaivel tar tals projects. Tenor el fa l'organisaziun recurs per examinar il project conscienziusamain.
Ins sto mirar ch'i na dettia betg segundas abitaziuns or da las abitaziuns administradas.
Abitaziuns secundaras explotadas turisticamain, er numnadas abitaziuns administradas, èn savens integradas en manaschis d'alloschament sco resorts turistics. Investurs ed investuras pon uschia cumprar abitaziuns secundaras sut tschertas cundiziuns. Tenor la lescha na dastgan las abitaziuns betg esser adattadas als basegns persunals dal proprietari ed ellas ston vegnir administradas d'in loschament organisà, sco per exempel in resort. Il gudogn da la locaziun sto ir en la cassa dal resort e betg en quella da l'investur.
Ina situaziun betg cuntentaivla per omaduas partidas
Per il president communal da la vischnanca Tujetsch, Martin Cavegn, haja Helvetia Nostra creà sez quai ch'ella cumbattia ussa. Helvetia Nostra saja stada quella che hajan promovì la lescha da segundas abitaziuns.
Uss vesan els ils problems e na fan nagut auter che d'esser encunter dapertut.
Per Rudolf Schaller è la lescha davart las abitaziuns secundaras in problem. Tenor el cuntrafa la lescha per part a l'intent da l'iniziativa. Quai ch'ils iniziants numnan sin lur pagina-web in cumpromiss cun las partidas burgaisas, è per Rudolf Schaller anticonstituziunal.
La situaziun n'è uschia betg cuntentaivla per ils iniziants da l'iniziativa cunter segundas abitaziuns d'antruras sco er per las autoritads communalas en la Val Tujetsch.
La patruna da construcziun dal resort a Dieni, l'Andermatt Swiss Alps, ha en il fratemp prendì posiziun cunter il recurs da Helvetia Nostra. Il dialog è lantschà.
