Cun la lubientscha ch’è uss sin maisa po in project grond da l’Andermatt Swiss Alps vegnir realisà sin la vart grischuna. Uschia vegn il CEO Raphael Krucker cità en ina communicaziun a las medias. Suenter che la dumonda da construcziun saja concedida, possia uss la planisaziun en detagl vegnir fatga. Durant il process da dar la lubientscha ha la vischnanca tractà trais recurs, dus da quels sajan retratgs ed uschia schliads. Surtut sajan era las pretensiuns principalas da Helvetia Nostra vegnidas resguardadas, scriva l'Andermatt Swiss Alps. Lez recurs n'è dentant anc betg dal tut giud maisa.
Ussa possian las abitaziuns da vacanzas che vegnan administradas vegnir vendidas. Ed era l'hotel possia uschia vegnir realisà pli baud u il medem temp sco las abitaziuns.
Planisà èn 13 bajetgs
Il ressort Dieni prevesa la construcziun da 13 bajetgs a la staziun a val dal territori da skis d’Andermatt-Sedrun a Dieni. Las lavurs da construcziun vegnan a cumenzar probabel il 2026, la finamira è da construir tut fin il 2029. Planisà èn 13 bajetgs cun total 410 chombras da hotel e 119 abitaziuns supplementaras da vacanzas administradas che pon era vegnir vendidas. Planisadas èn abitaziuns da differenta grondezza, dal studio fin ad abitaziuns da 5,5 chombras.
