Ils emprims arrivan gia avant las 10:00, l'avertura uffiziala da la deponia provisorica amez la vischnanca da Trun. Esser ad uras per betg stuair star en colonna.
Claudio Scolieri e Felix Venzin han oz da manischar la deponia. Els èn lavurers da la vischnanca da Trun e guardan che tut il rument sa tschenta en la dretga mulda. Els fan dentant bler dapli che quai. Els gidan mintga convischina e mintga convischin da purtar la rauba or dal vehichel ed els partan era cun tuts e tuttas intgins pleds.
Inqual giadas vegnani la damaun e din da metter da la vart insatge specific – mintgatant han ins fortuna e mintgatant er abetg.
Spert èsi cler: qua s'inscuntra l'entir vitg. Igl è in ir e vegnir, barattar intgins pleds cun quel e l'auter e forsa anc ina sgnocca vitiers. L'entir microcosmos d'ina pitschna vischnanca pon ins persequitar.