La sonda saira ha in chatschadur, che vuleva sajettar ina vulp, sajettà sin in chaun e tutgà quel mortalmain. Quai è capità la notg enturn las 23:00. Il cas ha procurà per grondas undas en las medias e las raits socialas. La Polizia chantunala investighescha en chaussa. Per Vus ha il producent RTR en Surselva e Grischun central, Reto Pfister (RP), retschertgà il stan actual e metta a lieu.
Èsi enconuschent tge ch'è capità a Sedrun la sonda saira?
RP: Jau hai telefonà cun il pledader da medias da la Polizia chantunala. Lez ha confermà ils fatgs ch'èn gia enconuschents. Quai è, ch'ina dunna gieva a spass cun ses chaun sin ina via da quartier, cura ch'i saja crudà in tun or d'ina buis, ed il chaun – ch'era vi da la corda – saja dà ensemen. Suenter l'annunzia, che la dunna ha fatg immediat a la polizia, ha lezza chattà anc la medema notg l'um ch'aveva sajettà sin il chaun. Lez ha concedì d'avair sajettà. Il mument è la Polizia chantunala vida far las inquisiziuns necessarias.
San ins pertge che l'um ha sajettà?
RP: Sco ch'il chatschadur ha ditg a RTR era el persvas d'avair sajettà sin ina vulp. Igl è da dir che chatschaduras e chatschadurs pon actualmain ir a la chatscha da lajetg. Quella ha lieu da l'entschatta da november enfin la fin da favrer. Quai mintgamai da las tschintg e mesa enfin las set la damaun, pia durant la saira e la notg. Sajettà vegnan durant quel temp cunzunt vulps, tais e fiergnas. Mintga chatschadur po annunziar maximalmain trais posts per ir a questa chatscha. Sajettar dastgan ils chatschadurs e las chatschaduras mo ord bajetgs fix sco chasas, clavads u hittas da lajetg. Il chatschadur a Sedrun ha sajettà ord sia chasa a l'ur dal vitg.
Co è quai lura pussaivel ch'ins sajetta sin in chaun enstagl d'ina vulp?
RP: Cler è, ch'il chatschadur n'ha betg savì, sin tge ch'el sajetta. Era sch'el era persvas da sajettar sin ina vulp, mussa il cas ch'el ha sajettà sin insatge ch'el na saveva betg, tge ch'igl è. Da quests cas datti adina puspè. Savens pertutga lura auters animals selvadis sco lieurs, chavriels, ubain era lufs e mintgatant era l'agen chaun. Il bler n'èn quels posts betg gist sper il vitg, e nagin che na fa persenn da quai. Tge che vegn engrevgiant latiers en quest cas è ch'il chaun era anc vi da la corda, e ch'il lieu, nua ch'il chatschader ha sajettà, è en ina zona, nua ch'igl è scumandà dad ir a chatscha da lajetg.
Pos ti declerar quai pli exact. Pertge na dastgan ils chatschadurs betg ir dapertut a chatscha da lajetg?
RP: Cun l'augment dal dumber da lufs ha l'Uffizi da chatscha decretà avant in pèr onns ch'i saja scumandà dad ir a chatscha da lajetg en la vischinanza da vitgs ed aclauns. Quai per impedir ch'ils chatschadurs che mettan ora estga per trair las vulps, attirian era ils lufs en ils vitgs. Uschia datti enturn tut ils vitgs ed aclauns abitads sisum la Surselva in territori da circa 100 meters, nua ch'igl è scumandà d'installar posts per la chatscha da lajetg. Il chatschadur pertutgà ha sajettà ord sia chasa ch'è a l'ur da Sedrun, e perquai en questa zona da scumond. Vegn latiers ch'el h'ha era betg pudì annunziar la chasa sco lieu per ir a chatscha, perquai che sia chasa è en questa zona. Concret munta quai ch'el n'avess uschè u uschia gnanc dastgà sajettar.
Tge capita cun il chatschadur?
RP: Quai n'è anc betg cler. Pussaivel è ch'i dat differents puncts d'accusaziun. Quai po esser d'avair cuntrafatg a la lescha d'armas, da betg avair respectà la lescha da chatscha u d'avair periclità persunas per negligientscha. Sin la dumonda, en tgenina da questas direcziuns che la polizia investighescha, n'ha lezza betg vulì prender posiziun. Il proxim temp vegnian tut ils pertutgads interrogads. Suenter che las retschertgas sajan a fin surdettia la polizia quellas a la procura publica. Lezza decida lura, sch'i vegn – sche insumma- avert in'inquisiziun penala, ed en tge direcziun che quella giess. Il cas vegn a cuzzar in'urella e per il chatschadur vegn el en mintga cas a restar en schletta memoria.
Sco adina vala la presumziun d'innocenza.