Ina da las duas parcellas da l'anteriur hotel Oberalp a Sedrun vegn ingiantà la fin da mars da quest onn, quai è communitgà en il figl uffizial chantunal. La summa da la stimaziun uffiziala da l’areal amez il vitg da Sedrun munta a radund 820'000 francs.
L’istorgia enturn quest areal è lunga. L’interpresa Prime Elements dal chantun Zug aveva cumprà l’anteriur hotel or da la massa da concurs. Il 2016 ha ella alura stgarpà giu il bajetg e planisà da realisar plirs bajetgs per in nov hotel ed abitaziuns da vacanzas.
Realisà era vegnì sulet ina part da las garaschas sutterranas. Alura ha quai dà pliras decisiuns da dretgiras fin a la decisiun da la primavaira passada che la Prime Elements haja da refar l’areal a moda oriunda fin la fin da zercladur. Quai n'è betg succedì.
