Siglir tar il cuntegn

Header

video
Prime Elements e la ruina da Sedrun
Or da Telesguard dals 24.04.2023.
laschar ir. Durada: 2 minutas 38 Secundas.
cuntegn

Tujetsch Dretgira federala decida en favur da la vischnanca Tujetsch

Dapi sis onns è l’areal da l’anteriur hotel Oberalp en il sien d’enviern. L'hotel vegl è davent ed ils investiders che vulevan construir in nov hotel e duas chasas cun abitaziuns paran era sparids. Ils daners han mancà per realisar tut ed uschia resta ina part gia realisada da las garaschas ed ils tschalers. Questa part ha la vischnanca da Tujetsch pretendì da dismetter e reconstruir. L’interpresa ha prendì la via sur las dretgiras e la finala ha il Tribunal federal dà raschun a la vischnanca. Uss sto l’interpresa Prime Element dismetter e refar l’areal a moda oriunda. Ed il Tribunal federal ha era fixà in termin, uschia ston las lavurs esser fatgas sin la fin zercladur, accentuescha il president communal Martin Cavegn. Quai saja d’avantatg perquai na stoppia la suprastanza betg metter sezza in termin e possia uss observar tge che capita en chaussa.

audio
Sedrun: Prime elements – rumida enfin ils 30 da zercladur
ord Actualitad dals 24.04.2023. Maletg: RTR
laschar ir. Durada: 3 minutas 16 Secundas.

Exempel co quai na duai betg funcziunar

L’entira istorgia enturn il project «4Peaks» da l’interpresa Prime elements è surtut ina istorgia da dretgiras. Ils responsabels n’han la finala betg chattà ils daners per realisar ils plans ed han adina puspè dumandà per ina prolungaziun da la lubientscha da construcziun. La finala ha la vischnanca da Tujetsch betg pli concedì quella e la decisiun ha il Tribunal federal prendì il 2019. Dapi lura è la dumonda da remetter l’areal tema da las dretgiras, fin il mars 2023 nua che la pli auta dretgira en Svizra ha prendì la decisiun en favur da la vischnanca da Tujetsch.

Plans per l’areal na datti nagins

L’interpresa domiciliada en il chantun Zug n’è fin uss betg stada cuntanschibla per RTR. Fin ils 30 da zercladur ha l’interpresa temp da far las lavurs. Il president communal da Tujetsch quinta era che quellas lavurs vegnian fatgas, era sch’els n’hajan betg contact direct cun l’interpresa. Quai na dovria er betg, la sentenzia è clera e l’interpresa ha anc avunda temp da far las lavurs. Sche quellas na vegnian alura propi betg fatgas alura possia la vischnanca laschar far las lavurs e metter a quint ellas. Ma quai vegnia il temp a mussar, uschia il president communal Martin Cavegn.

RTR actualitad 06:00

Artitgels legids il pli savens