La novelegida presidenta communala, Katrin Blumberg, è stada enfin ussa suprastanta communala e la responsabla per l'infrastructura, il lavuratori communal, la dismessa ed il turissem. Professiunalmain è ella dapi passa 15 onns mainafatschenta d'ina interpresa che organisescha turas da riverrafting. L'enviern lavura ella per la scola da skis. Plinavant lavura ella sco mediatura independenta. Il temp d’uffizi da Katrin Blumberg sco nova presidenta da Sagogn entschaiva il prim da fanadur.
Jau vi tadlar sin la populaziun ed jau quint rinforzar la collavuraziun cun lezza.
Cun sia elecziun è Katrin Blumberg la suletta anteriura suprastanta che resta èn quest gremi davent dal fanadur. Sper Thomas Candrian chalan Martina Beeli, Georg Felix e Raphael Egli. Da nov èn Alexander Ernst - il cuntracandidat per il presidi - e Hannes Furger elegì en la suprastanza communala. Dus sezs da quest gremi restan vacants, planisà èsi dentant da chattar candidatas u candidats sin la proxima radunanza il zercladur.
Sper la presidenta ed ils ulteriurs suprastants han las votantas ed ils votants elegì Curdin Venzin, Andreas Riedmayer e Thomas Candrian en la cumissiun da gestiun. En la cumissiun da bajegiar èn Tizian Monn e Raphael Egli vegnids elegids, ed en la cumissiun Sagognturissem ha il suveran elegì Marc Woodli, Giovanni De Carlo, Barbara Kunz e Franziska Bruhin.
Rinforzar la chanzlia per distgargiar la suprastanza
Il suveran da Sagogn è suandà unanimamain la proposta da la suprastanza da reveder la constituziun communala uschia che la chanzlia communala po surpigliar dapli lavurs e survegn uschia dapli cumpetenzas. Ultra da quai han las votantas ed ils votants sustegnì la dumonda d'emploiar in'ulteriura persuna per la chanzlia communala. Plinavant ha il suveran approvà cun grond surpli da reveder l'urden da classificaziun, pia la salarisaziun, ed uschia augmentar tranter auter in zic las indemnisaziuns da la suprastanza.