Bab e figl èn en il curtin da la plaiv catolica da Sagogn vi da la racolta da maila. Fadri scurla ils mailers, uschia che la maila dat per terra en il lom pastg levet bletsch. L’um da 33 onns è pumicultur passiunà.
Quai fatsch jau gugent dapi ch’jau sun in buob. Quai è propi in fieu.
Quel fieu haja el en ils gens, di er ses bab Augustin Beeli. Ils tats guardavan gia da lur puma en il Vitg Dadens da Sagogn. E là datti anc adina blers curtins. Quels furmian ina zona fitg impurtanta, manegia l'inschignier forestal emprendì Fadri Beeli. Tranter il vitg e la zona agricultura intensiva sajan ils curtins impurtants per la biodiversitad.
Fadri Beeli è cuntent cun la racolta da quest onn. Betg tut las plantas sajan tuttina, ma quai saja bun uschia.
Jau sun cuntent cun la racolta. Betg tut las plantas ch’èn tuttina, tge ch’è bun uschia. Sch’i fiss memia bler na dumagnass ins er betg.
Ils dus umens prendan si da plaun la maila e rimnan quella en harassas da lain. Ina da quellas emplenidas paisa var 25 kilos. Suenter ina, duas uras lavur han ils dus umens emplenì in pèr chistas. Quellas portan els ensemen si avant chasa, betg lunsch davent dal curtin da la plaiv. Ord da quella maila fan els lura most.
Las persunas giuvnas mancan en l'Uniun da pumicultura Surselva
Sep Benedetg Candinas, pur e possessur da plirs pumers a Sumvitg, è dapi quasi l’entschatta commember da l’Uniun da pumiculturs Surselva. Dapi radund 15 onns è el en suprastanza ed actualmain è el president. Sep Benedetg Candinas è entrà curt suenter la fundaziun èn l’uniun.
En il mument manchia l’activitad en l’uniun, manegia el. Quella uniun haja 45 commembers, be var 12 persunas èn anc activas. Per che la pumicultura surviva na dovria betg in’uniun, ma i fiss propi donn sch’i na dess ella betg, manegia ses president.
Or da l'archiv
Avant prest in onn – suenter la racolta da maila – è il Minisguard stà sin visita en ina mostaria a Glion per guardar co ch'i dat or dal mail il most dultsch.
