L'anteriur rapper da las Liricas Analas, Roman Flepp, vul daventar president communal da la vischnanca da Breil. «Per dumagnar nov schlantsch en la suprastanza dovri nova glieud. Nossa finamira è da gudagnar trais sezs per avair ina maioritad», di Roman Flepp. El saja vegnì pledentà e motivà dad intginas convischinas e convischins da Breil da candidar per l'uffizi dal president. Cun Ramon Schmed ed Adrian Bergamin haja el chattà duas persunas cun las medemas valurs e finamiras.
Il suveran ha l'ultim pled. Sch'in u l'auter da nus na vegn betg elegì, guardain nus co proceder.
La populaziun giavischia che tuttas e tuts sajan represchentads en la suprastanza da la vischnanca, di il president actual. «Lur moda da candidar sco gruppa da trais persunas è per mai speziala – per dir quai diplomaticamain», di Clau Schlosser. El è dapi 10 onns president communal e candidescha in'ulteriura giada per pudair far o da las differentas fracziuns da Breil ina unitad. La vischnanca è fusiunada dapi l'onn 2018, la via da colliaziun tranter Breil ed Andiast n'exista dentant anc betg.
Mes giavisch è da pudair realisar la via da colliaziun tranter Vuorz e Breil e cun quai manar a fin quai ch'jau hai cumenzà.
Nov schlantsch u blera experientscha?
La gruppa enturn Roman Flepp ha formulà otg finamiras. Tranter auter vulan els megliurar la communicaziun, modernisar l'administraziun communala, professiunalisar l'uffizi da construcziun e sviluppar il turissem. Era Clau Schlosser è motivà da prender per mauns novas chaussas. Per el èsi dentant era impurtant da mantegnair quai che Breil ha.
Per Roman Flepp fiss quai l'emprim uffizi en la politica. Ils ultims nov onns ha el lavurà tar ina gronda fatschenta dad IT nua ch'el è stà en la direcziun. Grazia a questas experientschas è el persvas da pudair manar ina vischnanca. Clau Schlosser ha ils ultims onns fatg il pur sper ses pensum da 60% sco president communal. Ussa ha el surdà il manaschi.
Tensiun a Breil
Sper ils candidats numnads qua sura, candidescha era Pascal Spescha dad Andiast per in set en la suprastanza. Per ils 5 sezs en suprastanza dat quai pia 8 candidats. Las elecziuns èn ils 15 da zercladur 2025.