La suprastanza aveva da lezzas uras anc argumentà ch'i na saja betg l'incumbensa da la vischnanca da manar in’ustaria ed ha proponì da la vender. Las votantas e votants han dentant cleramain decidì che la vischnanca duai mantegnair l’ustaria dal vitg. Quai cun sanar il bajetg mo minimalmain e procurar per in'ustier u ina ustiera.
Suenter in onn e mez che l'ustaria è stada serrada, avra l'ustaria Posta Veglia a Schluein puspè sias portas. Dapi il settember 2024 era l'unica ustaria dal vitg serrada. A partir da questa primavaira duai quest lieu d'inscunter a la via principala en la Surselva puspè survegnir vita.
3 Variantas: Engrondir, sanar u vender
La radunanza communala dal november 2024 aveva mussà: Las ed ils da Schluein vulan avair opziuns per pudair decider, co vinavant cun l’ustaria dal vitg, La «Posta Veglia». La proposta da la suprastanza da far abitaziuns per indigens n’aveva betg persvadì dal tut las votantas e votants da Schluein.
La radunanza aveva alura decidì da cuntinuar cun la planisaziun. La suprastanza communala aveva proponì 3 variantas:
- Construir ina chasa da generaziuns cun abitaziuns per glieud indigena, tge che muntass in engrondiment dal bajetg existent. Quai muntass custs da circa 5,2 milliuns francs.
- Sanar minimalmain il bajetg existent per utilisar quel sco fin ussa, tge che muntass custs da da sanaziun da var 500'000 francs, quintà sin ils proxims 10 onns.
- Vendita da l'entir bajetg per 900'000 francs. Quai senza ina part da la parcella.
La procedura da votar entras eliminaziun successiva e la dumonda da midar ina tractanda han procurà per in tschert schuschuri avant la votaziun. Il votum per anc ina giada reanimar la «Posta Veglia» e mo sanar minimal il bajetg è dentant stà uschè cler sco il sulegl. Las votantas e votants èn suenter viva discussiun e pliras votaziuns sa decis cun 61 encunter 3 vuschs per ina sanaziun minimala da l'ustaria. La vischnanca duai anc ina giada ir a la tschertga d'ustiers.
La radunanza communala duai decider anc ina giada
La vendita sco era la chasa da generaziuns n’eran anc betg dal tut giud maisa. Igl era previs che la radunanza communala decidia anc ina giada, co vinavant cun la «Posta Veglia». Ins pudess dir: far ina bilantscha provisorica. Dapi lura marschava la tschertga da novs ustiers.
Igl è status quo, almain enfin il proxim zercladur. Enfin alura guardain da chattar in nov affittader.
Per quella lavur survegn ella sustegn da la cumissiun «Posta Veglia» ch’è sa fatschentada da la rendita e dals tschains da l’ustaria. La vischnanca aveva cumprà l’ustaria l’onn 2017 e sanà il bajetg l’onn sisur. Ils cust totals per quai avevan alura muntà a passa 1,3 milliuns francs. Tenor la vischnanca n'hajan ins betg pudì far remessas durant tut quest temp.