La populaziun saja malcuntenta cun ils custs en il sectur da scola che creschian cuntinuadamain, perquai haja dà in Na a la radunanza communala, quai declera il president communal da Schluein Ralf Schläpfer. Il budget planisà saja vegnì surpassà, quai saja er gia dà en egl a la cumissiun da scola. Lezza haja lura dà en incumbensa a la direcziun dal consorzi da scola da far respargns. Er Ralf Schläpfer fa part da la cumissiun da scola.
La cumissiun da scola ha dà en incumbensa d'optimar las grondezzas da classas per spargnar en connex cun ils custs da persunal.
Betg be las pajas ma en spezial lezzas fetschian or ina buna part dal budget. Chattar nua ch'ins pudess spargnar exact quai saja uss l'incumbensa dal consorzi da scola. Da la direcziun dal consorzi da scola Laax, Falera, Sagogn e Schluein n'è enfin venderdi avantmezdi nagin stà cuntanschibel per prender posiziun en chaussa.
