La scola media spezialisada è en il trend, quai conceda tant la scola a Glion sco era a Cuira. Surtut il champ da lavur pedagogica è tschertgà. Uschia frequentan il mument 139 scolaras e scolars en set classas la scola media spezialisada a Cuira. A Glion èn quai il mument 36 scolaras e scolars en trais classas e sumegliant vesa quai ora a Schiers, nua che 33 scolaras e scolars frequentan en trais classas la scola media spezialisada.
Midada da scola mercantila en scola spezialisada
Surtut a Glion, ma era en tschels lieus da scolaziun, è d’observar il trend: da la scola media mercantila tar la scola media spezialisada. Quai haja surtut da far ch'i dettia en il sectur mercantil bleras plazzas d’emprendissadi ed uschia tschessia la dumonda suenter ina scolaziun mercantila, di il manader da la furmaziun da scola media a Glion, Marcus Beer. Cun nizzegiar las sinergias e cun ina lubientscha speziala dal chantun possia la scolaziun a Glion il mument però vegnir garantida. Uschia frequentan a Glion las scolaras ed ils scolars la furmaziun generala communablamain.
Ils onns maghers vegnan anc
Dentant saja il mument anc d’observar co la demografia sa mussia propi. Surtut las proximas annadas che vegnan ord scola sajan savens annadas flaivlas, di Marcus Beer. Uschia na possia ina planisaziun en detagl betg vegnir fatga e la scola a Glion stoppia uschia mirar mintgamai dad onn tar onn. Ma il mument sajan ins optimistic da surmuntar era quella sfida, accentuescha Marcus Beer.
RR actualitad 12:00