Ch'il dumber da scolars e scolaras a la scola mercantila e propedeutica (FMS) a Glion è plitost bass fa in zic mal il venter tant mainascola Roman Cantieni sco er a Roger Tuor, il mainafatschenta da la regiun Surselva ch'è purtadra da la scola.
Che la cifra da scolars e scolaras è plitost bassa n‘è dantant nagin fenomen nov. Perquai ha la scola era gia stuì prender mesiras sco per exempel da metter ensemen roms.
Offensiva da marketing duai gidar
Per far frunt al problem haj'ins cumenzà in project da marketing, di Roman Cantieni. Ensemen cun ils scolasts e las scolastas haj'ins tschertgà ideas sco ch'ins pudess far reclama per lur scola. A favur da quai vegnia er a dar ina collavuraziun cun la Scola auta spezialisada dal Grischun FHGR.
Forsas essan nus stads ils ultims onns in zic memia bufatg. Auters fan dapli reclama e pli gronds sforzs per attrair ils giuvenils.
La reclama duai capitar sin diversas plattafurmas digitalas ma era cun occurrenzas sco per exempel in turnier da ballape u ballarait per demussar uschè bain sco pussaivel ils avantatgs da la scola survesaivla e famigliara. Er il mainagestiun da la regiun Surselva Roger Tuor è stà da la partida tar l’occurrenza da chattar ideas per far promoziun per la scola.
Igl è impurtant ch'ils scolasts e las scolastas èn involvadas a las mesiras da marketing per la scola.
Sin l'onn da scola 2027/2028 fa l'entir center da furmaziun Surselva midada da las localitads tar las Soras dominicanas en la claustra a Glion en il bajetg nov sper la staziun da Glion. Cun il nov lieu da scola duess la purschida vegnir pli attractiva e forsa er attrair scolars e scolaras da Panaduz, Domat u Razén.
Las fullas da giuvenils e giuvenilas na vegnian dentant betg a vegnir, di Roger Tuor. Las cifras da giuvens e giuvnas che vegnan or da scola s'augmentan dentant puspè, uschia ch'i dat ils proxims onns puspè dapli scolars e scolaras pussaivlas per la scola mercantila e propedeutica a Glion.