La raschun daco ch'ils mastergners vegnan stgars è da chattar sin plirs nivels. La demografia saja franc ina raschun, di Flurin Maissen da la scrinaria Tarzisi Maissen da Trun. El fa attent che Trun avevia ina giada passa 30 naschientschas ad onn ed ussa sajan quai anc 8-10 naschientschas. Uschia na possia quai betg tanscher da cuvrir ils basegns d'emprendistas ed emprendits da tut las branschas.
Actualmain èsi fitg grev da chattar lavurers qualifitgads, il dumber ch’e avant maun vegn stuschà d'ina fatschenta a l’autra. Ed integrar novs lavurers e lavureras è fitg grev.
In'autura raschun per la mancanza da lavurers e lavureras numna Jörg Gasser, il manader da l'Associaziun da scrinaris dal Grischun: El fa valair che memia bleras persunas veglian studegiar e betg pli far u emprender in mastergn manual sco scrinari e scrinaria.
Scrinari è in mastergn fitg strentg e nus stuain far grondas stentas per salvar la glieud sin il mastergn.
Che las pajas sajan memia bassas na crai Jörg Gasser betg. I saja però bain pussaivel ch'ellas sajan ina raschun ch'in u l'autra midia mastergn e daventia p. ex. pedela u policist.
