La primavaira è vegnì enconuschent che la directura da Sedrun Mustér Turissem, Simona Barmettler, sa retira da ses post. La destinaziun turistica ha menziunà motivs persunals per la demissiun. Uss – avant sia partenza la fin d'october – guarda Simona Barmettler enavos sin ses quatter onns sisum la Surselva, avant ch'ella mida tar la destinaziun Stoos-Muotatal.
Ina successura ubain in successur n'ha Sedrun Mustér Turissem anc betg chattà, mabain ina schliaziun ad interim:
Impurtant è da chattar il dialog
La schanza da vegnir en ina destinaziun ch’ins n'enconuscha betg uschè bain saja adina speziala. Alura vesian ins las valurs da la destinaziun e pussaivels svilups, pertge las persunas che vivan en la regiun hajan savens pers la vista sin las bellas chaussas, declera Simona Barmettler. Perquai saja stà simpel per ella da vesair il potenzial, surtut il potenzial per la stad cun las numerusas vias da viandar e da velo da muntogna.
Pli datiers da la famiglia
Era en sia nova sfida speria ella da pudair metter accents, ma surtut sa legria ella da vegnir pli datiers a sias ragischs ed a sia famiglia. Ella vegnia a sa chasar a Sviz, be in quart d’ura davent da Ägeri nua ch’ella è creschida si. Tge che restia, sajan surtut ils bels inscunters cun blera glieud e las experientschas ch’emplainan ses satgados, di Simona Barmettler. Ed in zic resta ella colliada cun la regiun, pertge ses mises en Tujetsch ch’ella ha affittà da la vischnanca vegnia ella a salvar, almain uschè ditg sco pussaivel.