Siglir tar il cuntegn

Header

cuntegn

Senda da tschimas Laax Burgais da Sagogn fan il pass tar proxima instanza

La vischnanca burgaisa da Sagogn n'è betg cuntenta cun la sentenzia da la Dertgira regiunala Surselva. Ella tira vinavant il cas e ha inoltrà ina dumonda d'appellaziun per effect suspensiv tar la Dertgira chantunala grischuna. Ina decisiun dal proxim stgalim giudizial n'è anc betg sin maisa.

La vischnanca burgaisa da Sagogn ha inoltrà a la Dretgira chantunala la dumonda per in stop da bajegiar per la senda da tschimas da Laax. Quella maina per part er tras territori da la vischnanca burgaisa. La Dretgira regiunala da la Surselva ha renvià gia l'avust la medema pretensiun dals burgais da Sagogn.

Ina cunvegna tranter la vischnanca burgaisa da Sagogn e la vischnanca politica da Laax regla il diever dal guaud en possess da la vischnanca burgaisa per la senda da tschimas. Quella pretenda en ina annexa da sclerir il possess da la funtauna Runs avant che cumenzar a construir la senda da tschimas. Per la Dertgira regiunala Surselva n'è quai dentant stà nagin motiv da sistir la construcziun da la senda da tschimas.

La vischnaunca burgaisa è percunter anc adina da l'opiniun che la cunvegna e las empermischuns fatgas da la vischnanca politica da Laax stoppian vegnir ademplidas. Dischillusiunada è la vischnanca burgaisa da Sagogn, tenor atgnas indicaziuns, da la construcziun da la via da tschimas sin intschess dals burgais da Sagogn, malgrà l’appellaziun cun effect suspensiv inoltrada a la Dertgira chantunala dal Grischun.

Il president communal da Laax, Franz Gschwend, ha confermà che las lavurs vid la senda sajan reprendidas suenter la decisiun da la Dertgira regiunala Surselva. Era sin l'intschess da la vischnanca burgaisa da Sagogn. Dettia la Dertgira chantunala suatientscha a la dumonda d'appellaziun da la vischnanca burgaisa, vegnian las lavurs da construcziun sistidas, ha Gschwend explitgà. In fatg ch’il president communal da Laax deplorass.

Gschwend ha menziunà las interpresas involvidas che stuessan chalar da lavurar e che la senda da tschimas vegniss uschia retardada. Il president communal ha anc ina giada punctuà la prontadad da la vischnanca da Laax da reglar da dumonda da las funtaunas cun la vischnanca burgaisa da Sagogn. Cun la vischnanca politica da Sagogn è il diever da las funtaunas pertutgadas regladas cun in contract da diever.

Ord l'archiv:

video
Dovra Laax ina senda da tschimas?
Or da Telesguard dals 04.12.2018.
laschar ir

RTR novitads 06:00

Artitgels legids il pli savens

Scrollar a sanestra Scrollar a dretga