Cun ils 31 da mars 2020 è l'Explorit e sias attracziuns svanida ord il Stenna center a Flem. L'avertura da quella attracziun per uffants e giuvenils è stada il december 2018.
Chantun era involvì
Da lezzas uras è la purschida dal Explorit vegnida taxada dal chantun sco relevanta per il sistem turistic da quella regiun. Il chantun ha empermess sustegn finanzial da fin 1,5 milliuns francs. Eugen Arpagaus da l'Uffizi d'economia e turissem ha anc betg vulì s’exprimer en chaussa.
Finiziun en etappas
Senza grondas caneras è l'Explorit svanida e quasi be entras ina casualitad è RTR vegnì attent sin quest fatg. Il Stenna center vegn suenter la crisa da corona bain puspè avert, dentant senza l’attracziun da Sciencecity e Kindercity.
Britta Kaula, la responsabla per marketing e communicaziun dal Stenna center, deplorescha che la firma Explorit ha prendì quella decisiun. Ina decisiun ch'è crudada en pliras etappas.
Il settember 2019 ha la Explorit surdà la restauraziun ed ils kinos a l'hotel Hide, ch'è medemamain domicilià en il Stenna center. Las cifras da visitaders han dentant betg tanschì ed uschia è la decisiun da bandunar Flem crudada. Davart da l'Explorit è nagin stà cuntanschibel per prender posiziun.
