Siglir tar il cuntegn

Header

cuntegn

Sfidas organisatoricas Ils premis èn la pli gronda sfida

In'uniun che po ozendi organisar in lotto be cun premis cumplettamain sponsurads, quai è probablamain la gronda excepziun. Tar l'uniun da pestgaders èsi la maschaida che fa ora il success. D'ina vart buns e fidaivels sponsurs, in fix budget sco era fatschentas che sustegnan fitg la cumpra da premis.

Els sa drizzian gia dapi onns adina puspè a las medemas fatschentas per cumparar ils premis, uschia Gian Battaglia, il president da l'Uniun da pestgaders da Sagogn. Uschia dettian quellas magari ils premis per lur pretsch da cumpra.

Nus avain uss plitost las rundas ualti gulivas e n'avain betg in premi spezial. I dat auters che porschan lura in e-bike u er in auto. Quai n'avain nus mai gì.
Autur: Gian Battagliapresident da l'Uniun da pestgaders da Sagogn

Plinavant possian els quintar cun fidaivels sponsurs. Quai grazia al fatg ch'els organiseschian be mintga dus onns il lotto (mintg'auter onn è la societad da musica en roda). Uschia sajan plirs sponsurs pronts da metter adina puspè a disposiziun premis dal tuttafatg gratuitamain.

Premis en la valur da passa 10'000 francs

Per che la saira rendia per l'uniun quinta Gian Battaglia cun circa 100 persunas che dettian or en media mintgina 100 francs. Mintga 10 fin 15 persunas dapli dettian lura gia in bel daner per la cassa da l'uniun.

Anc avant 30 onns survegnivan ins forsa per ina retscha in salami, per duas ina charnpiertg e per trais ina coppa. Quai ha midà fitg.
Autur: Antonia Tschuorgiugadra passiunada en Surselva dapi 30 onns

A Sagogn hai dà totalmain 16 rundas normalas e 4 supplementaras. Per ina retscha da la charta aveva il premi per il pli ina valur da fin 120 francs, per duas retschas fin 150 francs e per la charta plaina fin 240 francs.

Il lotto 2019 da l'Uniun da pestgaders Sagogn è stà in success. Radund 160 persunas han giugà, mangià e bavì quella saira.

Gea uschè lunsch essan nus cuntents cun la saira. Igl è stà flot glieud. Tgi va a chasa pli cuntent e tgi pli pauc, ma quai è il gieu da fortuna.
Autur: Gian Battagliapresident da l'Uniun da pestgaders Sagogn

Uschiglio engraziaivel per ils organisaturs

Per la saira da lotto a Sagogn tschentian els mintgamai in comité da tschintg persunas. Quellas organiseschian tut fin tar il di dal lotto. Quel di vegnian lura ils commembers e las commembras per gidar dad endrizzar la halla, servir, lavurar en cuschina ed a la fin puspè rumir la halla. Quai saja da dumagnar bain cun radund 25 commembers e commembras activas, manegia il president.

Cumpareglià cun ina saira da saut u da disco dettia ina saira da lotto in bun tant pli pauc lavur. Uschia saja la halla a Sagogn era gia quasi rumina radund in'ura suenter che l'ultim premi vegnia surdà.

RR actualitad 07:00