-
Bild 1 von 13. Il lotto da Sagogn porscha rundas gulivas. Vul dir ch'i na dat betg singuls premis ch'han ina enorm auta valita. Bildquelle: RTR, Gion Gieri Flepp.
-
Bild 2 von 13. Intgins premis sco p. ex. ils schambuns u la lantscha han in plazs pecial sin tribuna. Bildquelle: RTR, Gion Gieri Flepp.
-
Bild 3 von 13. Sin ina maisa davosvart en la halla èn las chartas prontas per giugadras e giugaders. Bildquelle: RTR, Gion Gieri Flepp.
-
Bild 4 von 13. La halla da la scola da Sagogn è bain emplenida e mussa: Lottos attiran anc adina. Bildquelle: RTR, Gion Gieri Flepp.
-
Bild 5 von 13. Els dattan en il tact. Ils dus umens che sesan sin tribuna. In tira or dal satg la cifra e l'auter prelegia ella. Bildquelle: RTR, Gion Gieri Flepp.
-
Bild 6 von 13. Ursin Derungs. È oriund da Vignogn e giugader da lotto passiunà. Bildquelle: RTR, Gion Gieri Flepp.
-
Bild 7 von 13. Las chartas d'Ursin Derungs. Da pausa ha el midà seria. Ina buna decisiun sco igl è sa mussà a la fin. Bildquelle: RTR, Gion Gieri Flepp.
-
Bild 8 von 13. Portafortunas na dastgan betg mancar. Marco Lechmann ha cun el l'elefant da «l'emissiun cun la mieur». La mieur ha el laschà a chasa questa giada. Bildquelle: RTR, Gion Gieri Flepp.
-
Bild 9 von 13. Datti in lotto vegnan las cifras controlladas ed il premi surdà avant ch'i va vinavant cun la proxima runda. Bildquelle: RTR, Gion Gieri Flepp.
-
Bild 10 von 13. Antonia Tschuor. Ella na manchenta dapi 30 onns quasi nagin lotto en Surselva. Bildquelle: RTR, Gion Gieri Flepp.
-
Bild 11 von 13. Finamira: Cuvrir tantas cifras sco pussaivel, uschè svelt sco pussaivel... ma i na va betg senza fortuna. Bildquelle: RTR, Gion Gieri Flepp.
-
Bild 12 von 13. Ina pitschna purschida d'ustaria na dastga betg mancar per tancar entergia tranter las totalmain 20 rundas da la saira. Bildquelle: RTR, Gion Gieri Flepp.
-
Bild 13 von 13. Il team da cuschina che procura per il bainstar corporal dals giugaders e da las giugadras. Bildquelle: RTR, Gion Gieri Flepp.
Sin tribuna da las halla da scola a Sagogn sa preschentan ils premis en la glisch dals reflecturs: In tablet, divers chanasters, buttiglias vin, magnuccas ed anc bler auter. Schambuns, satgados ed in segarievens pendan schizunt giu dal palantschieu sura.
Ils premis èn in bonus, ma principalmain vai per giugar e per il regl. E sch'ins gudogna insatge han ins natiralmain era anc plaschair londervi.
En halla han ils pestgaders mess ora per lung maisas e sutgas per bun 200 persunas. E malgrà che la cassa fiss atgnamain averta pir a partir da las 19:00 uras èn blers fans e rutinads gia vegnids avant. Uschia che la halla è bain emplenida gia curt suenter las set.
Jau n'avess betg pensà che gist tants vegnian e che quai emplainia l'entira halla...
Tipic lotto: baterlim e ruaus sa barattan
Il tact da la saira dattan ils dus pestgaders che sesan sin tribuna. Relativamain spert tira in dad els in cifra ord in satget e l'auter cloma ora ella. Ina suenter l'autra fin ch'insatgi cloma «Lotto!» nà da la sala. Igl è da tadlar bain per ch'ins na manchentia betg ina cifra... e gea betg disturbar il vischin u la vischina.
N'è in lotto per ina giada betg valaivel, chaschuna quai bain inqual chau cotschen ed in u l'auter nausch commentari.
Il gieu e simpel: Mintga giugader po cumprar in set chartas (pli bleras u pli paucas tenor giavisch e purschida). Mintga charta cuntegn trais lingias cun mintgamai tschintg cifras per linga. Quellas èn tranter in e novanta.
Davantvart vegnan las cifras tratgas ora e mintgin che ha la cifra correspundenta sin ina da sias chartas po cuvrir quella. «Lotto» datti mintgamai per ina lingia cuvrida, per duas e per l'entira charta.
A Sagogn cun premis en la valita da fin 120 francs per ina lingia, fin 150 francs per duas lingias e fin 240 francs per l'entira charta. Quai repartì sin 16 rundas normalas e 4 supplementaras.
Be dal cletg na sa fidan ils «profis» betg
Antonia Tschuor da Sursaissa è ina giugadra passiunada. Ella na manchenta dapi 30 onns quasi nagin lotto en Surselva. E sco «profi» ha ella natiralmain era sias atgnas chartas. Chartas che cuntegnan intginas cifras pliras giadas. Fin ussa haja ella fatg bunas experientschas cun quella tactica.
Avant 30 onns vegnivan anc vendidas be chartas singulas. Lura na devi anc betg las chartas da la saira e quai gieva magari fin las trais la bun'ura.
Sumegliant guarda quai ora tar ils dus collegas lumnezians Ursin Derungs e Marco Lechmann. Els n'èn anc betg uschè ditg da la partida sco Antonia Tschuor, ma era giugaders passiunads. Cun atgnas chartas che almain Ursin Derungs mida ora da pausa perquai ch'el n'ha betg tratg in premi.
Ins sto far gugent quai. Igl è bain lung sch'ins è qua quatter uras vid metter si quels chips.
Premis n'èn betg igl A ed O
Blers, tant rutinads sco entschaviders, fan valair ch'i na giaja ad els betg exnum per ils premis. Cler saja bel sch'ins gudognia insatge, ma il pli impurtant saja il giugar, la cumpagnia ed era il sustegnair las uniuns. E tuttina sch'ins giaja cun nagut a chasa u haja pliras giadas manchentà be per pauc in premi, saja quai bain in frust. Cuntrari dettia in gudogn puspè regl dad er visitar il proxim lotto.
Il pli grond premi che jau hai gudagnà ina giada è stà in pèr skis... il principal è da sa participar, gudagnar è lura secundar.
Ursin Derungs è dal reminent ì a chasa cun ina lantscha da pestgar e Marco Lechmann cun in tablet.
Ord l'archiv
RR actualitad 07:00