Finamira da la Gruppa da teater da Siat èsi d’inscenar tocs umoristics. Quai ch'ha cumenzà l’atun 1991 cun Romy Carigiet-Derungs, Berthold Derungs e Tarcisi Cavigelli cuntinuescha. Ed il public dastga sa legrar. Avant trais onns ha il toc «Ina bubronda magica» carmalà tschients aspectaturas ed aspectaturs. Ins ha gì il gaudi, la prestaziun collectiva ha retschavì laud general. Ins ha gì tschaffen d’ina inscenaziun cun ina buna maschaida da giugaduras e giugadurs cun experientscha e novas forzas.
Quest onn ha il reschissur Berthold Derungs preparà cun sia truppa in nov toc. In dals giugadurs da tschep, Ignaz Spescha, ha translatà en rumantsch ina cumedia purila da Hans Lallis «Aluis, nua eis ti staus?». Cun Ignaz Spescha èn sin tribuna Claudine Dermond, Giusep Vincenz, Arno Spescha, Sofia Spescha, Sabina Cahenzli, Elias Casanova, Angela Fleischli, Anina Veraguth e Tarcisi Cavigelli. Ellas ed els sa fultschan en las rollas dals confamigliars ed abitants da Raina. Aluis è il pur e possessur dal bain, sia consorta Silvia, ina resoluta dentant da bun cor, la patruna.
En la citad per far cumissiuns
La cumedia entschaiva cun la scena ch’ils da Raina spetgan ch’il figl Toni turnia dal Canada cun sia dunna Bethy. En chasa è in grond cunfar, tut che sa legra e sa prepara. Aluis e ses collega, il president communal Fontana, ston ir en la citad per far duas cumissiuns. Surprendentamain na turnan els betg a chasa. La catastrofa famigliara è programmada, perquai ch’els turnan pir la damaun, è quai anc cun ina bella matta nunenconuschenta. I paria ch’els hajan chattà en la citad ina pluschaina. Nua èn Aluis e ses cumpogn insumma stads sur notg? Aluis sto temair da survegnir l’arrest perpeten e ses camerat Fontana da sentir la torta da sia consorta Anna.
En la Sentupada
La Gruppa da teater da Siat sa legra da preschentar quella cumedia sin tribuna da la Sentupada. Ed il public dastga sa legrar da scenas da battacor ch’ins sto almain sponder larmas da situaziuns nunconfurmas. Las giugaduras ed ils giugadurs dattan caracter e vita al toc.