Siglir tar il cuntegn
cuntegn

Surselva Silvio Schmid sa retira sco CEO da l’Arena Andermatt-Sedrun

Il project da la colliaziun dals dus territoris da skis Andermatt e Sedrun è reussì. Quest project era collia stretg cun Silvio Schmid. Perquai ch’il project è uss fini, sa retira Silvio Schmid sco CEO e surpiglia autras funcziuns tar la Andermatt-Sedrun Sport SA.

Silvio Schmid CEO da las pendicularas da Andermatt-Sedrun dat giu ses post.
Legenda: Silvio Schmid CEO da las pendicularas da Andermatt-Sedrun dat giu ses post. RTR

Silvio Schmid è dapi il 2006 mainafatschenta da las pendicularas da Sedrun. Era è el stà l’emprim CEO da las duas pendicularas fusiunadas. Suenter ch’il project è uss realisà saja temp per novas sfidas, ha communitgà l’interpresa. Uschia vegnia Silvio Schmid a surpigliar las ultimas lavurs vi dal project ed uschia la funcziun da Peter Furger. Quel terminescha sia lavur sco mainaproject sin l’entschatta da l’onn che vegn.

Il cussegl d’administraziun da la Andermatt-Sedrun Sport SA tschertga uss ina nova persuna per la gestiun operativa. Fin che l'interpresa ha chattà in successur, vegn Silvio Schmid cuntinuar en sia funcziun da CEO.

Era vegnia Schmid a seser en futur en il cussegl d'administraziun da Sedrun-Mustér Turissem ed uschia represchentar las pendicularas en quest gremi, scriva la Andermatt-Sedrun Sport SA en la communicaziun.

RR novitads 16:00