Il cusseglier federal Ignazio Cassis è sa tegnì vi da sia empermischun ed ha visità la scola a Glion. Bun in’ura è el s’inscuntrà cun las scolaras ed ils scolars en l’aula. Mintgina e mintgin aveva preparà il pled d’ina spezialitad culinarica ch’era da chattar sin il taglier ed il cusseglier federal ha gì da respunder mintgamai il pled. La finala è il temp stà memia curt per pudair emprender ina massa, ha Ignazio Cassis concedì a la fin. Ma «la pulpa» lez pled saja restà.
Emna rumantscha duai cuntinuar
L’emna rumantscha en Chasa federala duai cuntinuar era l’auter onn. Perquai ha Ignazio Cassis envidà, il favrer u mars, las scolaras ed ils scolars a Berna. Uschia duai il rumantsch restar preschent er vinavant. Ed era Cassis sez vul sco proxim visitar in curs da rumantsch, ma probabel betg en Surselva mabain en l’Engiadina Bassa. Il pli impurtant saja che la lingua vivia cun il cor e cun plaschair. Quai saja la finala la quintessenza da la Svizra, uschia Cassis.
La visita dal cusseglier federal Ignazio Cassis a Glion
-
Bild 1 von 6. Bildquelle: RTR, Gionduri Maissen.
-
Bild 2 von 6. Bildquelle: RTR, Gionduri Maissen.
-
Bild 3 von 6. Bildquelle: RTR, Gionduri Maissen.
-
Bild 4 von 6. Bildquelle: RTR, Gionduri Maissen.
-
Bild 5 von 6. Bildquelle: RTR, Gionduri Maissen.
-
Bild 6 von 6. Bildquelle: RTR, Gionduri Maissen.
Uschia ha tut cumenzà
«Fissas Vus pront d'emprender rumantsch?», questa dumonda aveva Arina Bertogg tschentà ad Ignazio Cassis durant il livestream da RTR per l'emna rumantscha, il favrer da quest onn. Sia resposta è stada ch'el vegnia gugent ad emprender rumantsch en Surselva sch'el vegnia envidà.
Sin ils pleds suondan ussa fatgs. Questa saira ha Ignazio Cassis visità la scola superiura da Glion.