L'onn passà aveva il Skipass Surselva procurà per chaus cotschens tar enqual clientas e clients. Il motiv: Sper Laax ch'enconuscha gia dapi onns ina limitaziun da dis, ha era Andermatt-Sedrun-Mustér vulì limitar l'access a la clientella dal pass da skis, tge che ha procurà per brevs da lecturs en las discussiuns. RTR aveva rapportà.
Nus avain quest onn in Skipass Surselva uschia sco el era avant l'onn passà.
Las Pendicularas Surselva avevan sinaquai discurrì l'onn passà d'ina fasa transitorica. Ussa paran ellas d'avair chattà ina soluziun che pudess cunvegnir a la blera glieud. Tge che munta: La limitaziun en il territori da skis Andermatt-Sedrun-Mustér croda. Ils pretschs per persunas singulas ed uffants augmentan per radund 80 francs. Ils pretschs per la glieud indigena resta dentant sco l'onn passà.
Il president da las Pendicularas Surselva è cuntent cun quella soluziun. Augmentar ils pretschs per ina purschida reducida la stagiun passada n'era betg empernaivel. Cunquai che las pendicularas èn interpresas independentas stoppian ins mintg'onn chattar in consens. Per Markus Good èsi cler, ch'ins veglia mantegnair il Skipass Surselva ch'è tenor el in bun product. El restia retschertgas tar la clientella, quai è era stà uschia cun las restricziuns da l'onn passà.
