Ozendi ch'ils blers da nus passentan ina massa temp davant in visur u vi dal telefonin tschertgan adina dapli persunas era puspè in passatem senza visur. En lingua modern as discurra dals uschenumnadas «offlinehobbys». Ils pubquiz per exempel paran d'avair conjunctura auta. Era lavurs a maun paran puspè dad esser en il trend.
La saira da far chaltschiel han var 20 persunas chattà la via en la Snake Bar gist tar la staziun a val da las pendicularas da Laax. Surtut dunnas giuvnas enturn mez 20 sesan en in rudè cun lur projects da far chaltschiel. Dentant er in pèr dunnas pli veglias e singuls umens han chattà la via a Laax quella saira. I vegn baterlà, raquintà dals projects da far chaltschiel e dà tipps e trics.
La pli gronda surpraisa è, che surtut persunas giuvnas vegnan a far chaltschiel – cun quai na vess jau betg quintà.
Dus profis sustegnan las persunas che han differenta savida dal far chaltschiel. Ils dus profis che sustegnan durant la saria èn Hannah Maurer, che lavura uschiglio er en il local e Bea Ragettli. L'idea da la saira da far chaltschiel ensemen è vegnida da Bea Ragettli. Ella fetschia gia si'entira vita chaltschiel ed haja pensà ch'i fiss bel da far quai en cumpagnia.
-
Bild 1 von 4. Tgi che n'ha betg gia cumenzà cun in project da far chaltschiel po emprestar stgagnas e duvrar launa messa a disposiziun. Bildquelle: RTR.
-
Bild 2 von 4. Differents projects ch'èn gia vegnids realisads las sairas da far chaltschiel passadas. Bildquelle: RTR.
-
Bild 3 von 4. La runda da far chaltschiel en la Snake Bar a Laax. Bildquelle: RTR.
-
Bild 4 von 4. Era persunas ch'ins na spetgass forsa betg exnum ad ina saira da far chaltschiel han chattà la via a Laax. Per exempel in um giuven cun tatuà quasi da giudim fin sisum. Bildquelle: RTR.
Cun quai ch'ella enconuscha la responsabla dal local as haja mess per pes l'occurrenza. Reclama n'hajan ellas betg fatg grond. La saira da far chaltschiel è entant sa cumprovada: Da l'entschatta tschintg persunas l'atun passà è la gruppa creschida sin 15 fin passa 20 persunas.