Sonda suentermezdi èn passa 500 curridras e curriders sa participads a las diversas cursas popularas che cumenzan e fineschan suenter in gir enturn la citad puspè en il «Städtli». La buna aura ha era carmalà natiers aspectaturas ed aspectaturs che han animà la glieud ch'era vi da currer. Sco l'onn passà hai dà pliras cursas. Quella cun la pli gronda participaziun è quella da 4 miglias stada, tge che correspunda ad ina lunghezza da 6,6 kilometers.
Ina cursa varianta en la chalira dal di
Tranter las 15:00 e las 17:00 è la cursa dad 8 miglias stada, quella correspunda ad ina lunghezza da 13,6 kilometers. Cun da la partida è era Dario Tschuor stà. Il currider oriund da Rueun che abitescha a Glion è gia sa participà l'onn passà a la cursa d'otg miglias. El curra dapi quatter onns regularmain.
Igl ha parì pli strentg quest onn, las temperaturas eran pli chaudas.
Avant la crisa da corona fiss el mai vegnì sin l'idea dad ir a currer durant ses temp liber. Cun lavurar en il homeoffice ha Dario Tschuor dentant tschertgà e chattà l'equiliber cun quest sport. Ambiziuns n'ha el betg pli grondas, ma ina giada far in mezmaraton fiss tut tenor insatge.
L'uniun Städtlilauf a Glion è fitg cuntenta
La presidenta dal comité d'organisaziun, Marita Leis-Caduff, è fitg cuntenta cun l'eveniment. L'uniun Städtlilauf a Glion haja gì passa 480 annunzias da curridras e curriders, vegnent vitiers las annunzias d'oz, sajan passa 500 persunas al start, tge che saja fitg legraivel. I saja uschia cler ch'ins organiseschia l'onn proxim puspè la cursa populara che quinta las distanzas en miglias. Plinavant haja quest onn gì cun il walking ina disciplina dapli.
Nus essan surprendì fitg positivamain. Igl ha oz anc dà pulit bleras annunzias supplementaras, uschia ch'i vesa ora fitg bun.
A Glion vai vinavant cun las cursas enfin la saira a las 20:00. Il punct culminant sportiv è alura la cursa d'eliminaziun «7130» cun sportistas semiprofessiunalas e professiunals sco Doris Nagel.
Ils victurs da la cursa «7130»
Tar la cursa d'eliminaziun èsi decisiv d'avair ina buna tactica ed da parter en las forzas optimalmain. 15 rundas (en tut 7'130 meters) han ils participants e las participantas stuì currer senza interrupziun – mintga runda è la pli plauna persuna vegnida eliminada.
- Il tetel tar la cursa da las dunnas ha la favurita Doris Nagel-Wallimann gudagnà cleramain.
- La cursa dals umens era in zic pli stretga. Lukas Arnold, Andreas Messer ed Elias Willi han cumbattà per il titel. La finala ha Andreas Messer – victur da l'onn passà – puspè gudignà il titel quest onn.
