Las bunas relaziuns da naiv da l'enviern passà han procurà per il bun resultat da las pendicularas Sursaissa SA e Piz Mundaun SA. La svieuta tar las pendicularas da Sursaissa è creschida per varga 10% sin 5,4 milliuns francs. Al Piz Mundaun è la svieuta creschida per stgars 4 % sin 4,7 milliuns francs. Era il dumber da hosps è creschì per 12% en cumparegliaziun cun la media dals davos tschintg onns. Il davos enviern hai dà 325'000 entradas primaras.
Pli autas investiziuns che planisà
Sin fundament dal bun quint han las duas societads augmentà las investiziuns previsas per quest onn dad 1 sin bunamain 5 milliuns francs. Tranter auter vegn bajegià ina nova ustaria sin il Piz Sezner ed il sistem d’ennevar tranter Undermatt e Misanenga vegn renovà.
Consolidar las finanzas
Ils proxims onns duain la finanzas vegnir consolidadas, uschia ch’igl è planisà per il proxim temp naginas grondas investiziuns. Vinavant va dentant la planisaziun da schlargiar il territori envers vest encunter l'Um Su.
Novas purschidas per la stad
Cun la fundaziun da la Infra Mundaun SA - nua che las pendicularas Sursaissa Mundaun en era participadas - duai la purschida da stad vegnir augmentada. La Infra Mundaun SA ha duvrà trais emprovas enfin ch’ella è vegnida fundada.
RR novitads 11:00