La staziun da viafier a Trun è l'emprima staziun en l’entir chantun ch’ha er ina purschida per persunas tschorvas e cun problems da la vesida. Uschia èsi pussaivel da smatgar sin in buttun ed alura vegn activà in pledader che declera tge che capità il proxim temp, vul dir nua ch’il proxim tren parta u arriva, declera il directur da la Viafier retica Renato Fasciati. La realisaziun dal project ha durà dus onns ed en tut èn vegnids investids 19 milliuns francs.
La gronda part da l’investiziun è en la tecnica
Surtut l’entira tecnica è nova e per il mument la pli moderna sin l’entira rait da la Viafier retica. Igl è per exempel pussaivel da coordinar la glisch da la staziun durant la saira uschia ch’ins po optimar a moda ideala il diever d’electricitad, ma surtut era garantir la segirtad sin l’entir areal da la staziun – e quai 24 uras e 7 dis a l’emna, han ils responsabels declerà. Quellas investiziuns en la tecnica n’èn normalmain dentant betg visiblas e duain uss ademplir lur pensum plirs decennis.
-
Bild 1 von 7. Ina gronda gruppa da cussadentas e cussadents da la Casa Depuoz è vegnida a l'inauguraziun. Bildquelle: RTR.
-
Bild 2 von 7. La populaziun è vegnida en rotschas ad admirar la staziun nova. Bildquelle: RTR.
-
Bild 3 von 7. In regal per la Casa Depuoz. Bildquelle: RTR.
-
Bild 4 von 7. Da sanester: Dumeni Tomaschet (president communal Trun), Carmelia Maissen (manadra Departament d'infrastructura, energia e mobilitad), Mario Cavigelli (president dal cussegl administrativ da la VR), Gabriela Tomaschet (presidenta Casa Depuoz), Carla Balett (manadra da gruppa Casa Depuoz) e Renato Fasciati (directur VR). Bildquelle: RTR.
-
Bild 5 von 7. Era in ischi ha la vischnanca da Trun retschavì. Bildquelle: RTR.
-
Bild 6 von 7. La tecnica. Bildquelle: RTR.
-
Bild 7 von 7. Bildquelle: RTR.
Lescha d’egualitad duai vegnir applitgada
Ina da las grondas sfidas da la Viafier retica – ma betg sulet da lezza, mabain da l’entira branscha da transport – è l’applicaziun da la lescha vertenta d’egualitad. Quella è entrada en vigur il 2004, ma fin uss anc betg realisada sin tuttas staziuns. La staziun a Trun è ina da las emprimas pli pitschnas staziuns en Surselva ch’ha survegnì quest access. Uschia èsi uss pussaivel d’entrar e sortir dal tren tut sin in nivel ed er il sutpassadi è adattà per mintgin – n’emporta betg sch’el ha ina valischa greva u sch’el sesa en ina sutga da rodas, di Renato Fasciati. Quai saja er in avantatg per la viafier sezza, perquai che retards possian vegnir evitads uschia.
Ils proxims onns duajan uss pliras staziuns en Surselva vegnir renovadas. Per il mument sajan ins vi da planisar las staziuns da Versomi, Valendau, Castrisch, ma era Tavanasa e Sumvitg. Ma quai dovria simplamain temp ed era las resursas finanzialas. La finamira saja dentant clera: ins veglia ils proxims onns propi realisar la lescha d’egualitad e quai en l’entir chantun, ha era accentuà il president dal cussegl d’administraziun da la Viafier retica, Mario Cavigelli.