La Posta vul mantegnair l’atgna filiala a Mustér. Els na sajan betg en contractivas cun la vischnanca, conferma la Posta sin dumonda da RTR. Ina garanzia per il futur na possian els dentant betg dar, di il pledader da la Posta per la Svizra orientala, Thomas Schifferle. Uschia furmia la filiala a Mustér ina impurtanta pitga per la Posta en Surselva, e cumpletteschia la filiala a Glion.
Vella senza atgna filiala da posta
A Vella vul la Posta dentant midar l’atgna filiala en ina purschida cun partenari. Els sajan en contractivas cun la Posta, ma decisiuns finalas na sajan anc betg sin maisa, conferma il president communal Daniel Solèr. La finamira principala saja da mantegnair ina buna purschida da posta per la Lumnezia, e quai saja era pussaivel cun ina filiala da partenari. Ma la sperdita d’ina purschida e da las plazzas da lavur na sajan betg da beneventar, di il president en uffizi dapi l’entschatta dal onn.
Era la Posta conferma da vulair la schliaziun cun partenari, ma decisiuns finalas na sajan anc betg crudadas. A Vignogn nua ch’i dat fin uss ina purschida cun in partenari, serria il partenari la stizun. Perquai vegnian els a porscher in servetsch a chasa, explitgescha Thomas Schifferle.
Strategia da la Posta cun 800 atgnas filialas
La Posta vul mantegnair radund 800 atgnas filialas en l'entira Svizra. Uschia vul ella mantegnair e realisar il service public.
En il Grischun saja l’access ad ina purschida da posta en 20 minutas dà quasi dapertut en il chantun, di Thomas Schifferle. E la Posta vegnia era en futur ad avair en mintga vallada ina purschida.
