L’animal saja vegnì tractà dal veterinari e vegnia probabel a surviver l’attatga, ha confermà l’Uffizi da chatscha sin dumonda da RTR. Quai saja l'emprima attatga confermada sin in animal pli grond. Il territori en Val Stussavgia fa part dal triep dal Beverin, ma sche quai saja in luf da quest triep stoppia l’emprim vegnir confermà tras las emprovas da DNA. Era betg cler saja sche quai sa tractia d’ina attatga d’in luf u da plirs lufs.
Attatga betg quintada vid il contingent
Tenor l’Uffizi da chatscha na vegn quest cas betg quintà vid il contingent necessari per tschentar la dumonda da sajettar il luf. L’attatga po sulet vegnir menziunada sco remartga tar ina eventuala dumonda. Era betg cler è sch'i sa tracta dal medem luf che ha attatgà avant radund 10 dis in asen sin la Muntogna da Schons. Ins quinta da savair dapli suenter che las emprovas da DNA èn vegnidas fatgas, uschia l’uffizi.
