Il president communal Armin Candinas è stà nov onns en uffizi e sa retira sin la fin da zercladur medemamain. Il suprastant Giusep Bearth ch'è stà 12 onns en uffizi, quai ch'è era la limita d’uffizi a Sumvitg. Ils suprastants Robert Candinas e Marcus Duff èn omadus stads nov onns en uffizi. Flurin Berther da Rabius fa pir dapi la mesadad da questa perioda d’uffizi part da la suprastanza communala.
Nagina gronda surpresa
Gia avant trais onns aveva il president communal e trais dals geraus laschà sentir ch'els vulan chalar. Da lezzas uras han els midà maini pervia la perschuasiun che las contractivas da fusiun, ch'eran vegnidas lantschadas cun la vischnanca da Trun, possian vegnir realisadas entaifer dus onns. La fusiun è dentant messa sin glatsch.
Midar l'entira suprastanza communala è ina sfida
Sumvitg sto ussa tschertgar novas forzas per la suprastanza communala. Cunzunt ils adversaris dad ina fusiun ston ussa mussar colur. Igl è indispensabel ch'i dettia avunda candidatas e candidats per l'elecziun ch'ha lieu ils 10 d'avrigl 2022. Sche quai na gartegia betg, alura è il tema fusiun forsa pli spert puspè sin maisa che spitgà, pertge sch'ina vischnanca na vegn betg d'occupar ils sezs en suprastanza, alura na plaida betg bler pli encunter ina fusiun.
Fin ils 15 da mars pon novs uffizials s'annunziar per in u l'auter uffizi. Las elecziuns èn fixadas sin ils 10 d’avrigl.