Siglir tar il cuntegn

Header

audio
President Patrick Schaniel è 100 dis en uffizi
Or da Actualitad dals 18.10.2022.
laschar ir. Durada: 4 minutas 10 Secundas.
cuntegn

Sumvitg Patrick Schaniel: «Impurtant è da tegnair a mastrin l’agenda»

El na saja betg stà conscient che quai saja gia passà 100 dis dapi il cumenzament da ses uffizi sco president communal, di Patrick Schaniel. Il temp saja quasi sgulà e impurtant saja da tegnair bain a mastrin l’agenda e betg da laschar dictar l’agenda tge ch’è da far. Ma qua haja el agid da sia dunna che fetschia attent cura ch'i saja memia bler, di Patrick Schaniel che ha 49 onns ed è maridà e bab da dus giuvenils.

Las sfidas èn multifaras

Ina vischnanca a la periferia stoppia adina guardar da pudair tegnair il status quo. Quai veglia dir che la populaziun possia viver bain ed er chattar lavur, u pudair pendular en lieus da lavurs sco a Cuira. La pandemia haja mussà ch’ins possia lavurar er da la periferia anora e quai saja ina schanza. Per pudair far quai dovria dentant per exempel bunas raits d’internet, e quella haja Sumvitg.

Ma er spazi da viver saja impurtant d’avair per la giuventetgna e per famiglias. Ils ultims onns ha la vischnanca da Sumvitg construì en l’anteriura scola trais abitaziuns per giuventetgna ed uss anc duas per famiglias, ed els avessan pudì laschar a tschains quellas gist pliras giadas, quai che mussia ch’in basegn saja avant maun. Quai dentant betg sulet a Sumvitg, mabein en l’entira regiun, uschia Patrick Schaniel. Perquai saja er l’adattaziun da la planisaziun locala d’enorma impurtanza, ina sfida che fetschia mal ma che saja in pensum d’ademplir.

Energia ed ovras electricas

Er l’energia occupia il mument fitg. Uschia sajan ins vi d'elavurar nua pudair spargnar energia. Era vegnian ins proximamain a cumenzar cun l’ovra idraulica tar il reservuar a Cumpadials. Qua hajan ins spetgà anc in onn per pudair survegnir er in sustegn da la Confederaziun per questa ovra idraulica pitschna. Er ina sfida sajan las localitads per l’uffizi stradal e forestal. Qua sajan ins vi da guardar communabel cun la vischnanca vischina da Trun da chattar schliaziuns. La collavuraziun cun las vischnancas vischinas da Trun e Mustér vegnian a restar impurtantas, surtut cun Trun partian els gia bleras incumbensas e la collavuraziun funcziuneschia er senza fusiun a moda exemplarica, uschia Patrick Schaniel.

RTR actualitad 12:00

Artitgels legids il pli savens

Scrollar a sanestra Scrollar a dretga