Quai che ha cumenzà cun gronda speranza avant trais onns, para ussa da daventar in cas giuridic per il possess. Lura ha Rolf Diefenbacher, in impressari dal chantun Turitg, annunzià ch'el haja cumprà las aczias da la Tenigerbad SA da la famiglia Schulz da la Germania.
Ils plans era lura da reactivar l'hotel en ina moda u l'autra uschè spert sco pussaivel. Enfin ussa hai sulet dà plans, l'avertura lai spetgar.
-
Bild 1 von 2. In sguard sin il Bogn Tenigia bandunà da surengiu. Bildquelle: RTR.
-
Bild 2 von 2. Bildquelle: RTR.
Charplina per las aczias
L'emna passada han ins pudì leger en il fegl uffizial dal chantun che las responsabladads en la societad d'aczias sa midian. L'uffizi dal register da commerzi ha communitgà che Rolf Diefenbacher, ch'era enfin ussa il sulet commember registrà en la societad, vegni stritgà e persuenter entrian Anton Meier, sco president, e Sven Stecher, sco commember, da nov en la societad d'aczias.
Sin dumonda dad RTR ha Rolf Diefenbacher communitgà, ch'el na sappia nagut da questa midada. Tenor el saja el il possessur da tut las aczias ed uschia saja la midada en il register da commerzi illegala. Il nov president da la societad d'aczias dal Bogn Tenigia, Anton Meier, haja tenor el mess a disposiziun chapital per finanziar la cumpra e la sanaziun da l'object.
Anton Meier da sia vart fa ussa valair che Diefenbacher saja sulet stà il mainafatschenta da la societad d'aczias. Tut il chapital ed uschia era las aczias tutgian ad el. En ina radunanza d'acziunaris qualifitgada haja quella decis da midar ora ils responsabels da la societad.
Tenor l'extract dal register funsil tutgan las immobiglias dal Bogn Tenigia a la «Tenigerbad SA». Uschia n'èn fixadas naginas persunas natiralas sco possessuras e possessurs. Cunquai che tuttas duas partidas èn persvadidas ch'ellas han il dretg, ston ins far quint ch'il cas giaja davant dretgira.