Cun la midada d'urari dal december 2025 è la purschida dal traffic public en Surselva vegnida augmentada per radund 30%. Tranter Glion e Cuira sco era tranter Glion e Mustér circuleschan trens ed autos da posta en in tact da mes'ura.
La nova purschida n'ha dentant betg mo avantatgs: sper dapli colliaziuns per ils viagiaturs e las viagiaturas ha ella era chaschunà en tscherts cas dapli sfidas e malcuntentientschas tar il persunal da l'Auto da posta. Manischunzas e manischunzs da la Surselva, che vulan restar anonims, han exprimì envers RTR lur critica: bler temp da preschientscha, paucas uras pajadas e massa dis in suenter l'auter davos la roda da manar.
Hans Tüfer, in manischunz pensiunà ch'è 35 onns stà sin via per l'Auto da posta en la regiun da Tavau e che gida anc oz magari sch'i dovra, n'ha betg retegnientschas da discurrer en il microfon e da numnar las sfidas dal persunal.
Quai è schon problematic: ti entschaivas a las 5:30, lavuras quatter uras, has lura tschintg uras pausa e stoss il suentermezdi puspè far vinavant. E quella pausa? Betg pajada – quai è temp liber.
Pajà vegnia be il temp da via cun l'auto da posta. Uschia n'hajan ins nagut dal di, agiunta Hans Tüfer.
Nagin cas singul
Las sfidas numnadas n'existan betg mo en Surselva, mabain en l'entir Grischun. Roger Walser, manader da la regiun ost da l'Auto da posta, è conscient dals problems ed ha encletga per las malcuntentientschas. Tenor el sajan els en stretg contact cun tut las regiuns. Plans da servetsch nunattractivs cun bler temp da spetga hajan tenor el tranter auter da far cun la finanziaziun da las lingias.
La finanziaziun è centrala, questas lingias na pon betg cuvrir ils custs. Uschia existan reglas da gieu dal stadi e dal chantun che ston vegnir resguardadas. Perquai na pon ins betg adina evitar ch'il persunal sto mintgatant spetgar. Ins pudess naturalmain charrar dapli, mo quai na paja nagin.
Quest spagat saja dapi l'introducziun dal tact da mes'ura en la Surselva vegnì anc pli pretensius, declera il manader da la regiun ost. Enfin ussa hajan ins orientà l'urari en Surselva en emprima lingia tenor ils basegns dal manaschi. Cun il nov concept dal traffic public, ch'il chantun ha elavurà, stat ussa la clientella en il center. Quai haja chaschunà midadas che na chattan betg adina buna accoglientscha tar il persunal, uschia Roger Walser. Da quai sajan els pertscherts.
Malgrà plans da lavur nunattractivs e lungas serias da servetsch resguardia l'Auto da posta ils dretgs da lavur ed il contract collectiv da lavur (GAV), accentuescha Roger Walser.
Adriano Troiano, responsabel per l'Auto da posta tar il sindicat, è dal medem avis. Il team da planisaziun a Cuira sto resguardar ina gronda quantitad da prescripziuns cura ch'el fa ils plans da lavur – quai rendia quella lavur fitg pretensiusa.
In entir team s'occupa dals plans da lavur – ed els ston resguardar las reglas ed en il medem mument garantir che las lingias curseschan. Sch'insatgi croda ora, cumenza il calcular e planisar danovamain.
Naginas soluziuns simplas
Chattar soluziuns per las sfidas dal persunal saja tut auter che simpel, analisescha Adriano Troiano. L'Auto da posta sa stentia d'esser in bun patrun cun cundiziuns da lavur attractivas, uschia Roger Walser, manader da la regiun ost. La finamira saja ch'ins vegnia da meglierar la situaziun per il persunal.
Ch'i saja betg simpel da chattar soluziuns conceda era Hans Tüfer, l'anteriur manischunz. Impurtant saja dentant ch'i dettia in barat constructiv.
A la fin da l'onn vegnia era analisà quant savens che la nova purschida vegn duvrada, uschia Roger Walser. Ina midada da l'urari avess lura segir puspè in'influenza sin ils plans da lavur dal persunal.