L’onn passà ha l’Uniun da teater Sagogn festivà ses giubileum da 20 onns. L’uniun tutga tar las paucas en Surselva che porscha quasi mintg’onn ina cumedia rumantscha. Atgnamain era planisà da preschentar il toc da giubileum en halla, ma lura èsi vegnì tut auter.
Per la producziun «In asen per Tello» han ils responsabels decidì da midar il concept. Empè da giugar sin tribuna en halla, è l’entira producziun vegnida spustada en il liber. Ina decisiun che porta novas pussaivladads, dentant era sfidas organisatoricas e teatralas.
Culissa speziala sper il Casti Aspermont
Amez il vitg da Sagogn stat il Casti Aspermont. Directamain visavi, en il Curtgin Aspermont circumdà d'in mir da crap, han lieu las emprovas. Qua è vegnida construida ina tribuna da lain cun plazza per il public, integrada en l’ambient istoric. In nuscher amez il curtin fa part da la scenografia e dat al lieu ina atgnadad tut speziala.
Il curtin, cun sias dimensiuns limitadas, pretenda dentant in gieu precis. Mintga pass, mintga distanza tranter las persunas sin tribuna sto esser exacta. Detagls pitschens fan ina gronda differenza – in fatg che pretenda bler disciplina ed attenziun durant las emprovas.
Igl è stretg, igl e propi stretg. Nus duvrain naturalmain utensils e mobiglias sin tribuna, quai dovra coordinaziun per che ins haja avunda plaz.
Ina cumedia sursilvana betg istorica
«In asen per Tello» è ina cumedia sursilvana betg istorica, scritta aposta per il giubileum da l’uniun. L’acziun ha lieu l’onn 765. En il center stat Tello, l’uvestg da Cuira, che sa chatta en sia residenza a Sagogn. Cun ses scrivant vul el cumpilar in inventari da ses possess. Ma ruaus per far quai na chatta el betg.
En il vitg vegn celebrà in usit pajaun che Tello vul midar en in usit cristian – tranter auter per far buna figura tar il retg dals Francs. Per realisar ses plan dovra el dentant ina chaussa tut particulara: in asen.
Giugar sut tschiel avert
Teater en il liber munta adina era vegnir confruntà cun l’aura. Sche las cundiziuns èn idealas, porscha il lieu dentant in’atmosfera quasi romantica: pastg verd, mirs vegls, tschiel avert ed il Casti Aspermont sco culissa naturala. En cumbinaziun cun ils costums vegnan aspectaturas ed aspectaturs quasi transportads en in auter mund.
-
Bild 1 von 9. Il Telesguard ha visità la gruppa da teater curt avant la premiera. Bildquelle: RTR.
-
Bild 2 von 9. La producziun è en il curtin Aspermont a Sagogn. Bildquelle: RTR.
-
Bild 3 von 9. Bildquelle: RTR.
-
Bild 4 von 9. Bildquelle: RTR.
-
Bild 5 von 9. Bildquelle: RTR.
-
Bild 6 von 9. Bildquelle: RTR.
-
Bild 7 von 9. Bildquelle: RTR.
-
Bild 8 von 9. Bildquelle: RTR.
-
Bild 9 von 9. Bildquelle: RTR.
Anc èn las emprovas senza costums. Quels vegnan dentant en acziun pir cun l’emprova generala. Fin lura resta anc bler da far: trenar, repeter, perfecziunar ils ultims detagls e finalisar la tribuna.
Ina uniun pitschna cun grond engaschament
L’Uniun da teater Sagogn dumbra actualmain var 25 commembras e commembers. Ina cifra modesta, surtut sch'ins resguarda la grondezza dal project. Ch'i vegn tuttina realisà in teater en il liber è dentant il resultat d’in engaschament grond e d’ina buna cumpagnia aifer l’uniun.
La davosa giada ch’il teater è vegnì preschentà ordaifer la halla era tar il giubileum da 10 onns. Cun «In asen per Tello» scriva l’uniun ussa in nov chapitel da sia istorgia.