Dapi il zercladur 2022 è Toni Vinzens president da la Surselva Romontscha. Per el saja quai stà insatge dal tuttafatg nov da surprender in presidi dad in'uniun.
Manar sesidas e preparar tractandas, da quellas lavurs n'aveva jau anc mai fatg avant. Mias collegas e mes collegas da suprastanza han dentond introducì mai fitg bain.
Toni Vinzens di che la suprastanza da la Surselva Romontscha fiss gugent anc pli activa. I saja dentant savens ussa gia ina sfida da chattar termins communabel per tut ils commembers e las commembras da suprastanza. Quai haja da far cun la situaziun che tuts en era pulitamain engaschads cun la professiun ni autras activitads accessoricas.
Dumondas avertas
Toni Vinzens concluda or da la retrospectiva, ch’i duvrass dapli spazi per discutar en tge direcziun strategica che la Surselva Romontscha vul ir ils proxims onns. Per quellas discussiuns ni era per eruir tge projects che duain vegnir realisads, haja la suprastanza memia pauca peda.
In auter punct avert è la dumonda, sco promover ed integrar meglier la giuventetgna en la Surselva Romontscha. Ensemen cun la suprastanza vul Toni Vinzens eruir, sco la Surselva Romontscha pudess daventar pli presenta tar ils giuvenils.
La Surselva Romontscha è nunenconuschenta tar blers giuvenils. Jau sun segir che l'interess per la lingua e per la cultura rumantscha e avant maun era tar las giuvnas ed ils giuvens en Surselva
Calender Romontsch
Circa en il medem temp cun l’elecziun da Toni Vinzens al timun da la Surselva Romontscha, ha la suprastanza da quella decidì da surprender la redacziun dal Chalender Romontsch. Il president sez ha surpiglià la chauredacziun en collavuraziun cun redacturas e redacturs externs. Tenor Toni Vinzens duai quai restar ils proxims onns in'incumbensa ch’el vul exequir sper il presidi.
