Marc Bearth da Rabius ha oz 11 onns. El n'ha betg gì il pli simpel start en sia vita. El è naschì cun ina insuffizenza dals gnirunchels. Durant dus onns ha el mintga notg stuì far dialisa – enfin al telefon tant bramà: Marc ha survegnì in nov gnirunchel. En sasez in mument per finalmain pudair respirar profundamain.
L'onn 2023 èsi dentant vegnì ad in proxim culp da destin: ils medicaments, che gidan ch'il corp da Marc accepta il gnirunchel, han augmentà il ristg da survegnir cancer. E quai è capità. Ins ha scuvert in tumor en il venter da Marc uschia ch'el ha stuì far ina chemo.
Dapi la stad 2024 è quella a fin e Marc ha surmuntà il cancer. El sto dentant anc adina regularmain ir en l'ospital per far ina terapia d'immunitad.
Agid da dretg e sanester
Tut quai dovria enorm blera energia da Marc e sia famiglia. Gia plirs mais sajan las battarias propi fitg vidas. Insatge che dettia dentant forza enorma saja il sustegn da lur conturn. Gist era lur cuminanza en la vischnanca saja ina enorma pitga per la famiglia: ils auters geniturs porschan maun u portan pettas – ed ils conscolars e las conscolaras da Marc acceptan el uschia sco ch'el è e s'annunzian tar Marc sch'el è puspè en l'ospital.
E mintgatant datti schizunt acziuns pli grondas. L'acziun «Ruedi rennt» ha quest onn rimnà raps per uffants cun cancer. Per questa acziun è Ruedi Frehner, ch'ha 62 onns, currì 30 maratons en 30 dis – maratons ch'ins ha pudì sponsurar. In da quels maratons è vegnì sponsurà en il num da Marc Bearth. E cura che sia classa è vegnida a savair da quell'acziun, èsi stà cler, ch'ellas ed els vulan currer ina curta part da quest maraton ensemen cun Ruedi Frehner e mussar uschia ch'els sustegnan Marc. In bel mument per el e sia famiglia – in mument che dettia forza per temps pli dirs.