L’idea oriunda è stada da cumenzar l’onn da scola actual cun ina purschida d’ina scola internaziunala, tant a Mustér sco era a Winterthur. Ma pervia da memia paucas annunzias è quella purschida vegnida spustada per in onn, quai ha confermà il rectur dal gimnasi da la claustra da Mustér, Tom Etter. Els hajan gì annunzias, ma memia paucas per cumenzar, pertge sch’ins veglia manar ina classa d’internat alura basegnia quai era in tschert dumber da scolaras e scolars, accentuescha il rectur ch’è il medem mument era co-CEO da la scola nova. Perquai hajan els spustà il cumenzament da la purschida nova sin l’avust 2025.
Emnas da stad èn stadas in success
Per iniziar e far pli enconuschent la scola han ils responsabels organisà la stad passada duas emnas da curs, ina a Mustér ed ina a Winterthur. La purschida è vegnida nizzegiada da scolaras e scolars da la China, Vietnam, Pologna ed era auters stadis. Ils resuns sajan stads fitg buns, di Tom Etter. Ils responsabels èn il mument era a la tschertga da pussaivlas absolventas da la Swiss Boarding Schools en l’entira Asia, cunzunt a Vietnam ed en China. La tschertga communabla haja per els in grond avantatg, uschia hajan els pudì schliar l’atgna interpresa che tschertgava fin uss scolars e scolars da l'exteriur. Uss possian els nizzegiar las sinergias e spargnar resursas, declera Tom Etter.
Gimnasi na vegn betg tangà da la scolaziun nova
L’entira scolaziun al gimnasi da la claustra da Mustér resta tuttina. Las scolaras ed ils scolars da la Svizra fan la matura a Mustér e la purschida nova vegn terminada cun ils A-Levels, la maturitad internaziunala. La gronda differenza saja che la matura classica vegnia fatga en 12 roms, la purschida dals A-Levels en minimum sis roms. Era è la scolaziun dal tuttafatg separada. Quai veglia dir ch’ils scolasts e las scolastas vegnan da la Academia Group, l’organisaziun partenaria e la lingua principala è l’englais. Era las stanzas da scola e l’entira scolaziun è separada. Sulet activitads en il temp liber u roms facultativs possian tut tenor vegnir visitads communablamain, di Tom Etter. Ma l’idea saja propi da sparter quellas duas scolaziuns, perquai era dus differents nums.
