Planisà ha il chantun da renovar e sanar la via principala tranter Tavanasa e la via a Vuorz ed Andiast. En tut vegnan investids ils proxims onns 24,6 milliuns francs en questa sanaziun. Dasper las sfidas da la topografia datti era sfidas betg usitadas.
Fin a 30 tunnels per ils amfibis
Uschia èsi planisà da far sutpassadis per animals pli pitschens, surtut per ils amfibis, conceda Urs Amstutz da l'uffizi da construcziun bassa. Cunquai ch’ins haja ils ultims onns pudì evaluar l’entira situaziun cun dumbrar exact quants amfibis che traverseschan la via, hajan ins vesì la necessitad da quest project.
Biotops d'impurtanza naziunala
Ils biotops da «l’Ogna da Pardiala» sajan biotops d’impurtanza naziunala e da gronda impurtanza chantunala e regiunala. El n'enconuschia nagins sumegliants passadis d’amfibis, di Luis Lietha da l'uffizi d'ambient. Ils ultims onns hajan ins dumbrà dapli che 800 animals che vulevan traversar la via. Quai saja fitg blers.
Cun il project actual saja pussaivel da segirar als animals il viadi en lur biotops. Era possian ins cun las investiziuns actualas evitar ch'ins stoppia eriger mintg'onn las saivs provisoricas. Cura che las lavurs sajan terminadas, possian ins alura evaluar la situaziun e questas cifras vegnian segir ad interessar sur ils cunfins chantunals, di Luis Lietha. Fitg cuntents saja el da la collavuraziun cun l'uffizi da construcziun bassa. Tut las propostas da la vart dals amfibis, pia da l'Uffizi d'ambient, sajan vegnids resguardads e vegnian uss realisads, quai saja da beneventar. Surtut sch'ins resguardia che la topografia saja difficila, di Lietha.
