«Amez la stad nascha en Surselva in nov lieu d’inscunter per cultura e sentupada.» Cun quests pleds envida la pagina d’internet da Surselva Turissem a l'emprim teater da stad Surselva. A partir dals 13 d'avust 2026 datti in nov lieu per teater professiunal a Glion, infurmeschan ils organisaturs. I sa tracta d'in teater per tut las vegliadetgnas, per tut las linguas da la regiun e per mintga budget. L'actur professiunal sursilvan Curdin Caviezel è l'iniziant dal Teater da stad Surselva. El ha ditg en discurs cun la FMR ch'i saja in bellezza sentiment da pudair turnar e giugar en Surselva per il public indigen.
Curdin Caviezel è naschì il 1993 e creschì si a Luven. Suenter la scola è el stà in onn en l'America. Silsuenter ha el absolvì il studi d'actur a Berlin. Il 2014 ha Curdin Caviezel terminà il studi cun il diplom ed ha survegnì in engaschament stabel al teater a Quedlinburg e Halberstadt en Germania.
Dapi l'atun 2017 lavura il Sursilvan sco actur liber per differentas producziuns da film e teater. Avant paucs onns ha el giugà ina rolla en l'emprima seria rumantscha Metta da fein.
L'ultim temp è el stà engaschà tranter auter al teater Hans Otto a Potsdam, al Vorarlberger Landestheater a Bregenz, al Nordharzer Städtebundtheater, al Theaternatur Festival, cun il duo «caviezel & stohler» en Germania ed en Svizra. Plinavant ha el giugà a Cuira en teaters en il liber ed en la Klibühni. Il 2024 ha Curdin Caviezel realisà ses emprim grond project da solo cun il titel «9 Monate all inclusive» ch'è stà da vesair sin diversas tribunas en l'entir territori da lingua tudestga.
FMR: Co vegn ins sin l’idea d’organisar in teater professiunal da stad en Surselva?
Curdin Caviezel: Quest giavisch è naschì fitg baud tar mai. Sco giuven sun jau stà commember da la gruppa da teater da Luven. Quai è stà in fitg curt, ma in fitg bel temp. Là hai jau fatg persenn ch'i mancava en Surselva in teater professiunal sper las bleras ed excellentas producziuns da laics.
Jau hai adina gì en il chau da far insacura ina producziun da teater professiunala en nossa regiun ed uss èsi gartegià da realisar il Teater da stad Surselva a Glion. Questas producziuns vegnan probablamain ad avair lieu mintga dus onns. Las 14 producziuns da quest onn han lieu en il curtin dal Museum regiunal Surselva, in lieu predestinà per dar teater sut tschiel avert.
Co è quai per Vus da turnar da las tribunas internaziunalas e da giugar sco actur professiunal en Surselva?
Igl è bellezza per mai da pudair giugar teater a chasa. Jau sun era spanegià, co ch'i vegn ad esser da giugar teater professiunal per la glieud ch'ins enconuscha.
Pertge consista l'ensemble dal Teater da stad mo da profis e betg per exempel d’ina maschaida da profis ed amaturs indigens?
Intgins dals profis engaschads tar questa producziun èn era acturas ed acturs sursilvans e dal Grischun. Lura avain nus acturs svizzers ed internaziunals. Era sch'il Teater da stad è in teater professiunal, è ina buna part da las acturas e dals acturs indigens. Ed ins po dir che bleras acturas ed acturs han experientscha da giugar er sin tribunas da teater internaziunalas.
Pon ins dir ch'ina occurrenza sco il Teater da stad Surselva promovia il nivel dal teater insumma en Surselva?
Il teater professiunal en la regiun è qua per sustegnair l'entira scena da teater. En Surselva vegnan gea propi fatgas fitg bunas producziuns da teater sin in aut nivel. Per mai duessi esser in lavurar maun en maun, pia in cun l'auter. Ma quai n'excluda betg ch'i dat ina furmaziun da teater professiunala en Surselva. Jau manegel ch'ina chaussa na duai betg excluder l'autra.
Vus dal Teater da stad Surselva propagais vossa purschida cun ina pagina d’internet. Vus essas era fitg activs sin las medias socialas. Tge resuns avais survegnì fin uss?
Blers resuns. Bleras e blers din ch'i saja bun che nus fetschian il Teater da stad Surselva. Jau hai era gì resuns da persunas che dian ch'i saja bun che las producziuns sajan a Glion en in lieu central, nua ch'ins possia vegnir e turnar cun il traffic public.
Co è la tscherna da las trais producziuns da quest onn succedida?
Fitg simpel. Nus avain la finamira da cuntanscher in vast public. Il punct culminant da quest onn è la cumedia criminala «Achtsam morden» che vegn giugada per tudestg da scrittira e pledenta er ils turists en la regiun. «Achtsam morden» enconuschan bleras e blers forsa dals cudeschs u da la seria da Netflix.
La segunda producziun «Madame Montouchi» è stada in giavisch da nus, perquai ch’i sa tracta d’ina producziun en lingua rumantscha. Ed il terz toc «Herr Widerstand und seine Glücksmaschine» vegn giugà en dialect tudestg svizzer e pledenta ils uffants a partir da tschintg onns.
Cun trais producziuns da differenta tempra vulan ils organisaturs dal Teater da stad Surselva a Glion cuntanscher in vast public. Quai vul dir: persunas da lingua tudestga e rumantscha, famiglias ed amaturs da cumedias criminalas.
«Achtsam morden»
Björn Diemel è in advocat da success stressà cun stretga relaziun cun la mafia. Sin squitsch decent da sia dunna visita el in coach d’attenziun e stim. Ma uschespert ch'el cumenza ad arranschar sia vita tenor las reglas da quest coaching, daventa ses mund in auter.
Premiera è gievgia, ils 13 d'avust 2026.
«Madame Montouchi»
Cun questa producziun avran Angela Collenberg e David Flepp la trucca da Pandora. Ina cofra d'in pastizier grischun ch'è plain objects d'ina autra epoca ha chattà la via en il museum. Angela Collenberg e David Flepp sa schluitan en differentas rollas e s'avischinan melodiusamain a Madame Montouchi – u tuttina betg? Tgi era insumma questa bella dunna misteriusa cun in num uschè spezial?
Mardi, ils 25 d'avust a las 20:00 e sonda, ils 29 d'avust a las 17:00.
«Herr Widerstand und seine Glücksmaschine»
Signur Widerstand è in perscrutader caotic, nunstanclentaivel, che ha l'idea geniala da sviluppar ina maschina che fa cuntent. È quai sia schanza sin il Premi Nobel? Sia assistenta spontana, Betta, è dapi onns da sia vart e sustegna el a moda viva tar sias invenziuns. Ma plaunsieu cumparan impediments e resistenzas.
Sonda, ils 22 d'avust a las 14:00 e dumengia, ils 23 d'avust a las 11:00.
