Il nov post da distribuziun funcziunia sco ina butia temporara che ha avert ina giada per emna durant il medem temp en il medem lieu. A Mustér è quest post en il Center Aua Viva. Organisada e realisada vegn la repartiziun emnila da victualias da gidantras e gidanters voluntaris. Els prendan encunter las victualias e procuran per ina repartiziun gista.
Christoph Zingg e Hans Möckli-Fry surpiglian communablamain la direcziun dal post da distribuziun e coordineschan tranter auter las acziuns dal team da gidantras e gidanters cun en tut 26 persunas.
L'uniun s'engascha cunter «food waste»
Sco l'uniun scriva va en Svizra a perder circa in terz da tut las victualias producidas sin la via dal champ fin al plat. Quai correspunda ad ina quantitad da 2,8 milliuns tonnas «food waste» per onn. Il medem mument vivan en Svizra circa 745'000 umans sin u sut la limita da povradad. L’Uniun Maisa magica che vegn finanziada cun donaziuns s’engascha dapi 24 onns cunter il sfarlattim da victualias e cunter la povradad en Svizra. El salva victualias ch'èn anc bunas da consumar e porta quellas là, nua ch’ellas vegnan duvradas il pli urgent.
Avant in onn aveva l'uniun cumenzà cun uschè ina purschida per fugitivs a Mustér:
Or da l'archiv
