Siglir tar il cuntegn

Header

cuntegn

Traffic public Surselva Ir cun il tren fin al runal

Las pendicularas Surselva han ina purschida communabla, il pass da skis da la Surselva. Lez ha dentant ina purschida pli pauc questa stagiun, numnadamain il bigliet dal tren fin sin il pass Alpsu. Dentant vesa ella quai sco schanza per in bigliet per l’entira Surselva.

La purschida dals bigliets da skis da Andermatt-Sedrun-Mustér è quest onn senza la viafier Matterhorn-Gotthard (MGB). Las contractivas sajan stadas difficilas – ma la finala haja la viafier vulì dapli daners, e las pendicularas na sajan betg stadas prontas da pajar, di Silvio Schmid da l’Arena da skis Andermatt-Sedrun. Ma l’impurtanza da la viafier saja anc adina fitg gronda, surtut perquai ch’ella va tras il territori dal pass Alpsu e collia uschia per exempel la Surselva cun Andermatt era l’enviern. A lunga vista stoppia dar ina nova schliaziun, ma il mument na saja la purschida betg integrada. La prevendita mussa che sulet in quart da las cartas da l’onn vendidas ha era integrà la viafier. L’autra part dals clients ha elegì la purschida senza viafier.

audio
En Surselva duai la carta da skis cumpigliar tren e bus – quai vul l’Uniun pendicularas Surselva
03:36 min, Actualitad dals 21.08.2021.
laschar ir. Durada: 03:36 minutas.

Prender il problem sco schanza

Uss saja necessari d’agir e guardar che l’entira Surselva survegnia ina meglra purschida dal traffic public per pudair ir cun skis – uschia Martin Hug ch’era per l’ultima giada a la radunanza da l’uniun, perquai ch’el è uss president da vischnanca da Flem. Tar las pendicularas grischunas resta Hug dentant al timun – perquai ha el era ditg che uss saja la schanza avant maun, da meglierar la purschida dal traffic public en l’entira Surselva.

Uschia fiss per exempel tut il traffic public integrà, sch’ins cumpra ina carta dal di d’ina da las pendicularas en Surselva. Il mument stoppian ins emprim sclerir il basegn en ina gruppa da lavur, lura possian ins guardar en l'avegnir, uschia il president da las Pendicularas Surselva Markus Good. La Viafier retica scriva sin dumonda, ch’ella vul porscher maun a dapli integraziun dal traffic public. Ma ins stoppia emprim discutar ils detagls e lura possian ins era decider.

RTR actualitad 07:00

Artitgels legids il pli savens

Scrollar a sanestra Scrollar a dretga