Siglir tar il cuntegn

Header

audio
Midada d'urari: colliaziun pli baud da tren
Or da Actualitad dals 24.12.2022. Maletg: RTR
laschar ir. Durada: 3 minutas 14 Secundas.
cuntegn

Traffic public Tren pli baud da Cuira en Surselva – ma paucs s'accorschan

Dapi intgins onns datti il giavisch per ina colliaziun dal traffic public pli baud da Cuira en direcziun Surselva. En la Cadi avevan las interpresas da spetgar fin las 07:30 fin che l’emprim tren era a Mustér.

Perquai aveva Stefan Lutz, che maina in'interpresa da pictur, scrit a la regiun Surselva ina brev cun il giavisch per ina midada. Sco resposta aveva l’um ch’abitescha a Laus survegnì che la prioritad na saja betg dada il mument. Perquai n'aveva el er betg percurschì che la colliaziun saja uss vegnida realisada cun la midada d’urari. Ma quai fetschia grond plaschair da vesair che las vuschs vegnan er tadladas ed ils giavischs resguardads. Las colliaziuns dal traffic public sajan essenzialas per il svilup d’ina regiun e fin uss er sulet pussaivel dad ir engiu a lavurar, quai sa midia uss, di Stefan Lutz.

Er avantatgs per la chasa da tgira

La chasa da tgira Puntreis a Mustér aveva fin uss guardà che las collavuraturas ed ils collavuraturs possian vegnir en communitads d’auto a la lavur, che cumenza per regla da las 07:00. Uss ch’il tren è a Mustér da las 6:33 possian quels che giavischian era vegnir cun il traffic public a lavurar, in grond avantatg. Era per tschertgar emploiadas ed emploiads saja quai in avantatg per l’avegnir, di il manader da la chasa, Gian-Reto Nufer. El speria fitg che quai dettia era dapli colliaziuns dal traffic public per exempel dal Tujetsch u da Medel, pli baud en direcziun Mustér. Il mument stoppian dentant tuts anc vegnir conscients che quai dat quella colliaziun pli baud, pertge el sez n’aveva betg fatg persenn da quai, di Gian-Reto Nufer.

RTR actualitad 08:00

Artitgels legids il pli savens

Scrollar a sanestra Scrollar a dretga