L’interprendider e pictur Stefan Lutz sto mintga damaun vegnir da las 07:30 a la staziun a Mustér per sia pictura. Quai betg perquai che lezza fiss memia tard, na l’emprim tren da Cuira arriva lura a la staziun. Uschia stoppia el disponer il program e l’emprim organisar il material, e pli tard ir sin la staziun per cuntinuar il viadi al plazzal. Quai na saja betg ideal, di Stefan Lutz. Per meglierar la situaziun ha el inoltrà ina brev cun la dumonda per in tren pli baud en direcziun Cadi.
Quest onn na datti naginas midadas da l'urari
La procedura è che l’Uffizi d’energia e traffic examinescha tut las dumondas da vischnancas, u era da persunas privatas. Quest onn ha il chantun alura communitgà da far naginas midadas, quai sco consequenza dal svilup da corona nua ch’il traffic public è sa sminuì.
Ma in tren pli baud en direcziun da la Surselva saja davant sin la glista da prioritads. Ins na possia dentant betg dir sche questa colliaziun vegnia gia realisada l’auter onn. Quai conferma era il parsura da la cumissiun regiunala Surselva Ernst Sax. Els hajan survegnì la refusa actuala dal chantun, ma las prioritads da rinforzar il traffic public era en favur da las interpresas pitschnas en la Cadi sajan registradas e prioritaras. Els possian medemamain sulet far propostas, realisar stoppia il chantun las mesiras. Cun il project «retica 30+» saja il chantun gia londervi da meglierar il traffic public e da realisar in tact da mes’ura en l’entir chantun, pia era da Cuira a Mustér. Uschia vegnia quai a dar dapli colliaziuns dal traffic public en futur era en las regiuns, uschia Ernst Sax.
