Il chantun Grischun ed il Tessin vulan promover il traffic public. Perquai datti gia ina colliaziun cun l’auto da posta da Cuira a Bellinzona. Uss datti era ideas d’ina colliaziun tranter Mustér e Biasca.
Tessin ha promovì il traffic public
Il Tessin haja investì bler en il traffic public e quai veglia il Grischun nizzegiar, di Thierry Müller, il manader da la partiziun dal traffic public tar il chantun Grischun. Grazia al project dal tunnel da basa dal Ceneri hajan ins pudì reducir il temp da viadi da Bellinzona en il sid dal Tessin. Ed ins haja era collià il Tessin cun la Lumbardia entras in sistem da trens (TILO). Ed a Biasca hajan ils viagiaturs ina staziun dal tren cun colliaziuns fin a Milaun.
Avair in bun concept ed in plan da finanzas
L’idea d’ina colliaziun cun auto da posta ubain bus da Mustér a Biasca ed enavos è sin maisa. Els da l’uffizi da traffic sajan gia en discurs cun il Tessin, di Thierry Müller. I na saja dentant betg in project ch’ins possia realisar d’in di a l’auter.
Quai è in project a media vista ch’ins sto probabel realisar en etappas.
Ils dus chantuns stoppian anc sclerir detagls, tranter auter saja da crear in bun concept ed in plan da finanzas. E la finala dovria quai giasts che vulan far quest viadi.
