Tact da mes’ura per Savognin, curs supplementars la damaun e la saira fin Bivio, tact dad in’ura tranter Alvagni, Surava e Lantsch. Quai èn be in per meglieraments, ch’il sboz dal nov urari dal december, avess previs. In stritg tras il quint fà il chantun. Sco Mario Cavigelli, il parsura da l’uffizi da traffic scriva en ina brev a la Regiun Alvra, possia il chantun il mument betg lubir las novas colliaziuns en Val Alvra ed en il Surses. Tranter auter argumentescha Cavigelli cun la ferma sminuziun da las entradas en il traffic public suenter il mars 2020. Perquai stoppia il chantun refusar quasi tut ils giavischs per sviluppar il traffic public en il Grischun ad interim.
Tranter auter na vegnan era betg realisads il tact da mes’ura tranter Cuira e Tusaun, u in tact d’in quart d’ura tranter Flem e Laax. In meglierament che vegn realisà èn trens supplementars tranter Mustér ed Ursera la dumaun e la saira, ha ditg l'uffizi da traffic envers RTR. Quai saja dentant in «bonus» perquai ch'ils trens d'auto vegnan stritgads tranter Sedrun ed Ursera a partir dal 2023.
La resposta da Cuira na cuntenta betg
Il deputà da l’Allianza dal Center Reto Crameri da Surava ponderescha ussa, da far squitsch sin il chantun, ch’il svilup dal traffic public possia tuttina vegnir realisà, ha el ditg envers RTR. Ins sclereschia sch’ins veglia far quai cun in’intervenziun parlamentara. Uschia ch’i pudess il december 2022 dar ils emprims meglieraments.
