Siglir tar il cuntegn

Header

cuntegn

Trofea Péz Ault Da bun'aura va la victoria a Berna

La 12avla cursa da skis da tura la Trofea Péz Ault è ida a fin cun ina victoria bernaisa. Marco Wildhaber gudogna la cursa principala e quai gia per la quarta giada. El dumogna quai en in'ura e 46 minutas. Segund vegn il Grischun Dalcolmo Nico da Tavau. Ils organisaturs èn cuntents cun la cursa, en tut èn 56 curridras e curriders ids a la partenza.

L'emna passada han ils organisaturs anc fatg quitads

La cursa da skis da tura a Mustér, mintgamai la primavaira, ha tradiziun. Gia per la 12avla giada è ella vegnida organisada e quai cun l’agid da radund 50 voluntaris e voluntarias. Quai saja ina da las sfidas da chattar buna glieud ch’è disada da sa mover en las muntognas e che vul gidar e qua hajan els in bun sustegn da la secziun Péz Terri, di il president dal comité d’organisaziun Giochen Bearth. Er las relaziuns cun privel da lavinas e cun la naiv èn bunas quest onn. Ma la participaziun è memia bassa, di Bearth. Uschia pudessan anc 100 u 200 curridras e curriders dapli sa participar a quella cursa.

audio
Prevista sin la Trofea Péz Ault
ord Actualitad dals 17.03.2023. Maletg: RTR
laschar ir. Durada: 4 minutas 1 Secunda.

Pertge ch'i dat paucas annunzias è grev da dir

Las cursas cun skis da turas han ina tscherta popularitad, quai surtut en las regiuns francofonas dal mund. Ma la crisa da corona haja purtà ina gronda midada, perquai che dapertut sa mussia ch'adina pli paucas persunas vulan sa participar a talas cursas, di Giochen Bearth. Uss èn els a sa concentrads sin la cursa da la dumengia, la cursa principala, e lura vegnian els segir a stuair discutar co vinavant. Perquai che cun quellas paucas annunzias è la cursa periclitada, uschia Giochen Bearth.

Grond engaschi per preparar la cursa

Ils responsabels da la cursa, enturn il chau-cursa Luca Brunold, han l’entira emna preparà las rutas. L’interessant è da vegnir al lieu, observar la situaziun e lura guardar nua far la ruta, di Brunold. Per cletg possia el sa fidar sin in'entira squadra da gidanters e lura vegnian els uss da preparar per tuts ina cursa segira. Ina sfida saja segir la crappa, pli pauca naiv munta pli blera crappa, surtut tar las descensiuns, ma lura era il privel da lavinas e forsa anc ulteriuras sfidas. Perquai che la natira saja quella che cumondia, ed els possian sulet reagir, uschia Luca Brunold. Ma el è persvas ch’els vegnian da porscher ina cursa segira per tuts e quai saja l’impurtant.

RTR actualitad 08:00

Artitgels legids il pli savens