Siglir tar il cuntegn

Header

cuntegn

Trofea Péz Ault Idealas cundiziuns, ma paucas participantas e participants

Per la 11avla giada è la cursa da skis da turas vegnida organisada a Mustér, quai suenter ch'ella n'ha dus onns betg pli pudì vegnir realisada. A la partenza eran radund 50 curridras e curriders, sulet in terz da la participaziun normala.

audio
Impressiuns da la Trofea Péz Ault
ord Sport ed actualitad dals 20.03.2022.
laschar ir. Durada: 3 minutas 5 Secundas.

Las realaziuns da cursa eran fitg bunas, uschia ha l’aura constà, cun bler sulegl e las curridras ed ils curriders han chattà bunas cundiziuns da naiv. La damaun era il traject da cursa schelà, pli ditg che la cursa è ida e pli loma che la naiv è vegnida, uschia han declerà plirs curriders a l’arrivada. Ed era il responsabel dal di, Ruedi Büchi, ha declerà ch’el haja pudì giudair fitg la cursa, era sch’el saja stà en pliras funcziuns. El ha timunà quels dis il comité d’organisaziun, perquai ch’il president dal comité d’organisaziun Giochen Bearth n’ha betg pudì esser preschent. E per el persunalmain saja la cursa mintgamai in highlight, di Büchi.

Paucas participantas e participants

En l’entira Svizra sentian ins il mument che betg pli tantas persunas veglian sa participar a talas cursas popularas, ed era a Mustér sajan vegnidas quest onn sulet 50 persunas, bun in terz dals onns passads. Sco Ruedi Büchi ha raquintà sajan era tuttas e tuts s’annunziads pir a la fin, pia paucs dis avant la cursa, quai saja probabel in fenomen da la pandemia, ch’els sentian era. In auter motiv per las pli paucas participantas e participants saja che quai saja l’emprima ediziun insumma sco cursa populara, senza far part per exempel d’in cup svizzer, di Büchi.

Potenzial per cursas internaziunalas

Ed els veglian en avegnir puspè far talas cursas, uschia fiss ina finamira d’avair rodund 300 curridras e curriders. Per organisar la cursa dovra quai il medem engaschi, sche 50 persunas van a la partenza u 300, di Büchi. E sch’el guardia sin il svilup da talas cursas da skis da turas en Svizra franzosa, nua che plirs millis sa participeschian, alura vesia el schon era potenzial per Mustér. Pertge la cursa saja fitg alpina ed il medem mument fitg datiers da las pistas da skis, quai che saja in unicum en Svizra. Perquai haja quai bun potenzial da svilup. Ma per organisar cursas sin livel internaziunal, duvrassan els dapli sponsurs e sch’ins haja dapli participantas e participants, alura sajan ins era pli attractiv per sponsurs, uschia Ruedi Büchi, dal comité d’organisaziun da la «Trofea Péz Ault».

Gudagnà la cursa ha Marco Wildhaber

Gia per la terza giada ha Marco Wildhaber gudagnà la «Trofea Péz Ault» sur la distanza lunga da 14,7 kilometers ed ina differenza d’autezza da 1'640 meters. Gia da l’entschatta ha el dominà e distanzià ses adversaris per dapli ch’in quart d’ura. El noda a la fin in temp dad 1 ura e 47 minutas. Tar las dunnas gudogna Martina Senn cun in temp da 2 uras ed 8 minutas. Las curridras ed ils curriders indigens n’han giugà nagina rolla en il classament final.

RTR actualitad 17:00

Artitgels legids il pli savens