Siglir tar il cuntegn

Header

cuntegn

Trun Markus von Gradowski succeda a Tarcisi Maissen

Il medi oriund da Villingen/Schwenningen en il Schwarzwald, ha gia lavurà a Glion sco medi principal e cardiolog.

Il figl Gieri na fiss betg stà pront

Tarcisi Maissen è led ch’el ha chattà in successur. Ses figl Gieri ch'è era medi – na fiss betg stà pront perquai ch’el vul anc sa scolar enavant. Ma i na saja betg sclaus ch’el vegnia in di a lavurar en la regiun, forsa en ina pratica da cuminanza.

audio
Il medi Tarcisi Maissen ha suenter ditg tschertgar chattà in successur
ord Actualitad dals 18.12.2020.
laschar ir. Durada: 2 minutas 43 Secundas.

Betg simpel da chattar in successur

I na saja betg stà simpel da chattar in successur, di Tarcisi Maissen che surdat sia pratica il zercladur 2021 – cura ch'el ha 67 onns. L'inserat en la gasetta medicinala n'haja betg purtà il success giavischà. Lura saja Markus von Gradowski s’annunzià in di, quel haja udì da medis da la regiun che questa plazza a Trun saja libra.

Quai ha immediat funcziunà, la chemia ha funcziunà.
Autur: Tarcisi Maissen medi a Trun

El na saja betg mo stà persvadì da la savida da ses successur, di Tarcisi Maissen, mabain era da la persuna.

El è curtaschaivel, plain energia e fitg motivà da vegnir enavos en Surselva.
Autur: Tarcisi Maissen medi a Trun

Far insatge auter

Markus von Gradowski che ha 46 onns vegn cun sia dunna, ch'è era media, e ses dus uffants a Trun. Sco el ha ditg ad RTR vegnian els gugent enavos en Surselva.

Jau hai fatg 20 onns ospital ed insaco èsi stà per me in pass da dir: Jau vi far insatge auter.
Autur: Markus von Gradowski medi e successur da Tarcisi Maissen

In nov chapitel cumenza era per Tarcisi Maissen: la pensiun. Alura vul el sa deditgar dapli a ses hobis sco musica e sport e s'engaschar per natira ed ambient.

RTR actualitad 08:00

Artitgels legids il pli savens