Uniun sportiva Schluein Ilanz - «Cool Girls Play Soccer» – trenament da ballape mo per buobas

«Ti es ina buoba, ti na sas segir betg dar ballape», u «buobas duessan sautar u far acrobatica empè da ballape». Quai èn chaussas, che las buobas da l'US Schluein Glion audan adina puspè, perquai ch'ellas giogan ballape.

Quels pregiudizis hajan tranter auter inspirà la trenadra Adeline Berther da far in trenament mo per buobas. Cun il schlantsch dal campiunadi europeic da las dunnas questa stad, ha Adeline Berther organisà in trenament da ballape gratuit da tschintg giadas. Var 50 buobas hajan fatg part, di ella.

Ella haja era sentì che l'atmosfera saja tut autra, sche mo buobas sajan sin la plazza da ballape. «Las buobas sa sentan pli fermas», di ella. «Ellas na ston betg cumprovar ch'ellas èn meglieras u ch'ellas tutgan qua. Ellas dastgan simplamain esser.» Il num dal project è «US Schluein Glion en la fevra da l'euro». Cun quest num ha Adeline Berther motivà las buobas da giugar.

Ina buoba da 13 onns, Lorena, giauda quests trenaments mo cun buobas. «Ils giuvens cloman adina chaussas durant in gieu u sbragian sin il schiri. Lura vai pli ditg e nus pudain giugar pli pauc.» E sias collegas agiuntan: «Igl è pli cool mo cun buobas.»

Sch'ellas giogan ballape cun ils buobs, ston ellas mintgatant perfin interrumper il gieu, raquintan ellas. Tar las buobas na capita quai mai. Ad ellas plascha da giugar ballape, dad emprender novas chaussas e dad esser cun sias amitgas.

Ils tschintg trenaments dal project «US Schluein Glion en la fevra da l'euro» èn ussa passads – els han entschet ils 21 da matg ed han cuzzà fin ils 18 da zercladur. La trenadra ed organisatura Adeline Berther guarda enavos sin in temp cun blera plievgia, sco ella di, dentant era sin in temp fitg bel. La finamira saja ussa da fundar in'atgna gruppa da ballape, mo cun buobas, a partir da quest atun – ed in tricot han ellas gia. In alv cun strivlas nairas, cun scrit si il slogan: «Cool Girls Play Soccer».