En il Grischun tschessa la plievgia plaunsieu. Sper intginas bovas ed impediments sin via n’hai enfin la dumengia saira betg dà pli gronds problems. La situaziun saja dentant schon vegnida valitada endretg, di Urban Maissen, il manader da l'Uffizi da guaud e privels da la natira.
Ins ha avertì cun inditgar il livel 5, il pli aut ch’i dat. Per part è vegnì cuntanschì be livel 3, dentant hai dà lieus, nua ch’il livel 5 è stà giustifitgà.
En las valladas dil sid dal Grischun, nua ch'il privel pareva il pli grond, è l’aura sa calmada la dumengia suentermezdi. Ils flums gronds sco Rain ed En han manà davent l’aua senza grondas difficultads. Là schazegia Maissen, ch'i saja vegnì cuntanschì il pli dal tut il stgalim 3 da malaura.
Er sche l'aura vegn plaunet meglra, avertescha Urban Maissen dentant, ch'ins stoppia vinavant avair quità en las valladas dal sid ed en Surselva. Il flums ed auals mainian anc adina fitg blera aua ed er il privel da bovas na saja anc betg tschessà.
